បណ្ដាមន្ត្រីជាន់ខ្ពស់របស់ប្រទេសចិន និងសហរដ្ឋអាមេរិក បាន​ជួប​ពិភាក្សាគ្នា​ដោយ​ស្មោះ​ត្រង់​នៅ​ទីក្រុង​បាងកក ក្នុងគោលបំណង​កាត់​បន្ថយ​ភាពតាន​តឹង​រវាង​មហា​អំណាច​ទាំងពីរ​លើ​បញ្ហា​កោះតៃវ៉ាន់ និងប្រធានបទផ្សេងទៀត មុនពេលការហៅ​ទូរស័ព្ទ​នៅ​និទាឃរដូវ​ដែល​រំពឹង​ទុករ​វាង​ប្រធានាធិបតី​អាមេរិក លោក ចូ បៃដិន (Joe Biden) និងមេដឹកនាំចិន លោក ស៊ី ជីនពីង (Xi Jinping)។

ទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន (Jake Sullivan) បានជំរុញ​រដ្ឋមន្ត្រី​ការ​បរទេស​ចិន លោក វ៉ាង យី (Wang Yi) ឱ្យប្រើឥទ្ធិពលការ​ទូត​របស់​ប្រទេសខ្លួន ដើម្បី​បញ្ចុះ​បញ្ចូល​ប្រទេស​អ៊ីរ៉ង់ ឱ្យកាត់បន្ថយការគាំទ្រចំពោះក្រុមឧទ្ទាមហ៊ូទី (Houthis) ដែលវាយ​ប្រហារ​លើ​នាវា​ជំនួញនៅសមុទ្រក្រហម នេះបើយោងតាម​មន្ត្រី​រដ្ឋបាល​ជាន់ខ្ពស់​ម្នាក់​របស់​ប្រធានាធិបតី​អាមេរិក។

កិច្ចប្រជុំដែលមានរយៈពេលជាង ១២ម៉ោងក្នុងរយៈពេល ២ថ្ងៃ និងបានបញ្ចប់កាលពីថ្ងៃសៅរ៍ (២៧ មករា) នេះគឺមានបំណងបង្ហាញពីកិច្ចព្រមព្រៀងរបស់លោក បៃដិន និងលោក ស៊ី នៅ​ក្នុង​កិច្ច​ប្រជុំ​កំពូលរដ្ឋកាលីហ្វ័រនីញ៉ា (California) កាលពីខែវិច្ឆិកា ដើម្បីស្ដារឡើងវិញ​នូវ​កិច្ច​ចរចា​ការទូត​ដែលបែកបាក់លើបញ្ហាសន្តិសុខ និងសេដ្ឋកិច្ចពិភពលោកជាច្រើនដូចជា ការការពារ និង​ការ​ប្រឆាំងគ្រឿងញៀន ទោះបីជាមានការខ្វែងគំនិតគ្នាខ្លាំងក៏ដោយ។

ក្រសួង​ការបរទេសចិន និងសេតវិមានបាននិយាយនៅក្នុងសេចក្តីថ្លែងការណ៍ថា ភាគីទាំង​ពីរ​បាន​យល់​ព្រម​រក្សាទំនាក់ទំនងដើម្បីគ្រប់គ្រងលើបញ្ហារសើបផ្សងៗ៕