បើតាមការឲ្យដឹងដោយផ្ទាល់ពីយោធាអ៊ីស្រាអែល បានបង្ហាញថា មន្ត្រីយោធា និងចារកម្មរបស់អ៊ីស្រាអែល បានសន្និដ្ឋានថា អាវុធមួយចំនួនធំដែលក្រុមហាម៉ាសប្រើក្នុងការវាយប្រហារថ្ងៃទី៧ ខែតុលា និងក្នុងសង្គ្រាម នៅតំបន់ហ្កាហ្សាស្ទ្រីប បានមកពីប្រភពមិនទំនងសោះ។

អស់ជាច្រើនឆ្នាំមកនេះ ក្រុមអ្នកវិភាគបានចង្អុលបង្ហាញពីផ្លូវរត់ពន្ធក្រោមដី ដើម្បីពន្យល់ពីរបៀបដែលក្រុមហាម៉ាសរក្សាអាវុធយ៉ាងតឹងរ៉ឹង បើទោះបីជាយោធាអ៊ីស្រាអែលហ៊ុមព័ទ្ធតំបន់ហ្កហ្សាស្ទ្រីបក៏ដោយ។

ប៉ុន្តែការស៊ើបការណ៍ថ្មីៗនេះ បានបង្ហាញពីវិសាលភាពដែលក្រុមហាម៉ាសអាចផលិតគ្រាប់រ៉ុក្កែត និងអាវុធប្រឆាំងរថក្រោះជាច្រើនរបស់ខ្លួនពីគ្រាប់បែករាប់ពាន់គ្រាប់ដែលមិនផ្ទុះ នៅពេលដែលអ៊ីស្រាអែលវាយប្រហារពួកគេក្នុងតំបន់ហ្កាហ្សា។ នេះបើយោងតាមអ្នកជំនាញអាវុធ និងមន្ត្រីចារកម្មអ៊ីស្រាអែល និងលោកខាងលិច។

ជាមួយគ្នានេះ ក្រុមហាម៉ាសក៏កំពុងបំពាក់អាវុធដល់យុទ្ធជនរបស់ខ្លួនជាមួយនឹងអាវុធដែលត្រូវបានលួចពីមូលដ្ឋានយោធាអ៊ីស្រាអែល។ ការស៊ើបការណ៍សម្ងាត់ដែលប្រមូលផ្តុំបាន ក្នុងអំឡុងពេលជាច្រើនខែនៃការប្រយុទ្ធគ្នា បានបង្ហាញថា អាជ្ញាធរអ៊ីស្រាអែលមិនត្រឹមតែបានវាយតម្លៃខុស ចំពោះចេតនារបស់ក្រុមហាម៉ាស នៅមុនថ្ងៃទី៧ ខែតុលាប៉ុណ្ណោះទេ តែពួកគេក៏បានមើលរំលងពីសមត្ថភាពរបស់ក្រុមនេះ ក្នុងការទទួលបានអាវុធផងដែរ។

តែអ្វីដែលច្បាស់នៅពេលនេះ គឺថា សព្វាវុធដែលកងកម្លាំងអ៊ីស្រាអែលបានប្រើ ដើម្បីពង្រឹងការបិទតំបន់ហ្កាហ្សា ក្នុងរយៈពេល ១៧ឆ្នាំកន្លងមក ឥឡូវនេះត្រូវបានប្រើប្រាស់ដើម្បីប្រឆាំងនឹងពួកគេវិញ។ គ្រឿងផ្ទុះយោធារបស់អ៊ីស្រាអែល និងអាមេរិក បានធ្វើឲ្យក្រុមហាម៉ាសអាចបាញ់ស្រោចគ្រាប់រ៉ុក្កែតដល់អ៊ីស្រាអែល ហើយជាលើកដំបូង ប្រជ្រៀតចូលវាយលុកដល់ទីក្រុងនានារបស់អ៊ីស្រាអែលពីតំបន់ហ្កាហ្សា៕