ស្ថានភាពអាកាសធាតុដ៏ត្រជាក់ និងអ័ព្ទដ៏ក្រាស់ឃ្មឹក បានធ្វើឲ្យអ្នកដំណើរជាប់ទៅណាមិនរួច ដោយសារមានការពន្យារពេលជាច្រើនម៉ោង និងសូម្បីតែលុបចោលភ្លាមៗតែម្ដងនូវខ្សែរថភ្លើង និងជើងហោះហើរនានា ដែលត្រូវចេញពីទីក្រុងញូវដេលី ប្រទេសឥណ្ឌា នៅថ្ងៃចន្ទ (ទី២៩ ខែមករា)។

អ្នកដំណើរដែលជាប់នៅកន្លែងទាំងនោះ ត្រូវបានគេមើលឃើញជ្រកសម្រាកនៅលើកន្លែងឈររបស់រថភ្លើង ឬកន្លែងរង់ចាំរបស់អាកាសយានដ្ឋាន។ អ្នកស្រុកនៅក្នុងរដ្ឋធានីនៃប្រទេសឥណ្ឌា ជាពិសេសអ្នកដែលចាំបាច់ត្រូវធ្វើការនៅទីវាល ចំពេលមានអាកាសធាតុដ៏សែនត្រជាក់នេះ បានប្រឈមនឹងភាពត្រជាក់ខ្លាំងស្ទើរទ្រាំមិនបាន។

ផ្នែកខ្លះនៃរដ្ឋជិតខាងរបស់ទីក្រុងញូវដេលីក៏បានឃើញនូវអ័ព្ទក្រាស់ឃ្មឹកផងដែរ ជាពិសេសនៅពេលព្រឹកព្រលឹមថ្ងៃនេះ ដោយនាំឲ្យពិបាកមើលផ្លូវ ធ្វើឲ្យមានគ្រោះថ្នាក់ និងគ្មានសុវត្ថិភាពដល់ការបើកបរ។

យោងតាមការបង្ហោះរបស់នាយកដ្ឋានឧតុនិយមឥណ្ឌា នៅលើបណ្ដាញសង្គម X (ពីមុនជា Twitter) បានឲ្យដឹងថា អ័ព្ទពីក្រាស់ទៅក្រាស់ខ្លាំង ទំនងជាកើតឡើងលើផ្នែកខ្លះនៃភាគខាងជើងរដ្ឋ Uttar Pradesh នាពេលយប់ និងព្រឹកព្រលឹម រហូតដល់ថ្ងៃពុធ (ទី៣១ ខែមករា)៕