ភ្នំពេញ ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅរសៀលថ្ងៃទី២៩ ខែមករា ឆ្នាំ២០២៤ បានអញ្ជើញចូលរួមជាអធិបតីភាពក្នុងពិធីប្រកាសដាក់ឱ្យប្រើប្រាស់ជាផ្លូវការនូវផែនការយុទ្ធសាស្រ្តអ ភិវឌ្ឍសហគមន៍មូលដ្ឋាន ២០២៤-២០២៨។ ពិធីនេះ រៀបចំធ្វើឡើងនៅទីស្តីការក្រសួងបរិស្ថាន រាជធានីភ្នំ  ពេញ ដោយមានការចូលរួមពីមន្ត្រីក្រសួងបរិស្ថាន តំណាងសហគមន៍មូលដ្ឋាន និងស្ថាប័នពាក់ព័ន្ធមួយចំនួនទៀតផងដែរ។

នៅក្នុងឱកាសនោះ ឯកឧត្តមរដ្ឋមន្រ្តីបានថ្លែងថា «ផែនការយុទ្ធសាស្រ្តអភិវឌ្ឍ សហគមន៍មូលដ្ឋាន» គឺជាសមិទ្ធផលថ្មីមួយទៀតរបស់ក្រសួងបរិស្ថាន ដែលបន្តគាំទ្រលើកកម្ពស់ជីវភាពរស់នៅរបស់ប្រជាពលរដ្ឋក្នុងសហគមន៍មូលដ្ឋាន តាមរយៈការជំរុញទេសចរណ៍ធម្មជាតិ និងកៀរគរការចូលរួមពីវិស័យឯកជនចូលរួមអភិវឌ្ឍនៅក្នុងសហគមន៍ ដោយលើកទឹកចិត្តឱ្យសហគមន៍ទាំងនោះដាំដើមឈើដែលមានប្រយោជន៍ និងឈានទៅសហគមន៍អព្យាក្រឹតកាបូន នៅឆ្នាំ២០៥០។ ដើម្បីបន្តបេសកកម្ម និងចូលរួមអនុវត្ត «ផែនការ យុទ្ធសាស្រ្តអភិវឌ្ឍន៍សហគមន៍មូលដ្ឋាន» ឱ្យទទួលបានជោគជ័យ ឯកឧត្តមរដ្ឋមន្រ្តី បានផ្តល់អនុសាសន៍ណែនាំ ដល់អគ្គនាយកដ្ឋានសហគមន៍មូលដ្ឋាននៃក្រសួងបរិស្ថានពង្រឹងការអនុវត្តឱ្យបានខ្ជប់ខ្ជួន។

ផែនការយុទ្ធសាស្ត្រអភិវឌ្ឈសហគមន៍មូលដ្ឋាន ២០២៤-២០២៨ ត្រូវបានរៀបចំឡើងដោយមាន សង្គតិភាពជាមួយនឹងឯកសារយុទ្ធសាស្ត្របញ្ចកោណដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ យុទ្ឋសាស្រ្តចក្រាវិស័យបរិស្ថាន និងឯកសារគោលនយោបាយពាក់ព័ន្ធដទៃទៀតផងដែរ។ ដំណើរការនៃកា រៀបចំកសាងផែនការយុទ្ធសាស្ដ្រនេះ ត្រូវបានធ្វើឡើងដោយមានការចូលរួមពីភាគីពាក់ព័ន្ធនានា តាមរយៈកិច្ចប្រជុំពិគ្រោះយោបល់ជាមួយអង្គភាពជំនាញក្រោយឱវាទក្រសួង ស្ថានប័នពាក់ព័ន្ធនានា ដៃគូអភិវឌ្ឍ និងសហគមន៍មូលដ្ឋាន។ ផែនការយុទ្ធសាស្រ្តនេះ ផ្ដោតទៅលើកិច្ចអន្តគមន៍សំខាន់ៗចំនួន៣រួមមាន៖ទី១.លើកកម្ពស់គុណភាពជីវិត សន្តិសុខស្បៀង អាហារូបត្ថម្ភ និងការរស់នៅស្អាតរបស់សហគមន៍ ទី២.លើកកម្ពស់ជីវភាពប្រជាសហគមន៍ និងទី៣.បង្កើនការអភិរក្ស និងការអភិវឌ្ឍធនធានធម្មជាតិ និងវប្បធម៌។

បើតាមរបាយការណ៍របស់ក្រសួងបរិស្ថានបានឱ្យដឹងថា បច្ចុប្បន្នប្រទេសកម្ពុជា មានតំបន់ការពារធម្មជាតិចំនួន៧៣កន្លែង គ្រប់ដណ្តប់លើផ្ទៃដីជាង៧លានហិកតា និងសហគមន៍តំបន់ការពារធម្មជាតិ ចំនួន ១៩៣សហគមន៍ គ្រប់គ្រងលើផ្ទៃដីព្រៃទំហំជាង៣សែនហិកតា ៕ អត្ថបទ៖ទូច សោភ័ណ