រដ្ឋាភិបាលបូលីវី បាននិយាយកាលពីថ្ងៃចន្ទ (២៩ មករា) ថាមនុស្សយ៉ាងហោចណាស់ ២២នាក់ បានស្លាប់ដោយសារភ្លៀងធ្លាក់ខ្លាំងនៅទូទាំងប្រទេសបូលីវី ចាប់តាំងពីខែវិច្ឆិកា មក។

លោក ហ័ន កាឡូស កាលវីម៉ុនតេស (Juan Carlos Calvimontes) អនុរដ្ឋមន្ត្រីក្រសួងការពារជាតិស៊ីវិលបាននិយាយនៅក្នុងសន្និសីទសារព័ត៌មានមួយថា «ចាប់ពីខែវិច្ឆិកា ឆ្នាំ២០២៣ ដល់ខែមករា ឆ្នាំ២០២៤ នេះតំបន់ចំនួន ៧ ត្រូវបានរងផលប៉ះពាល់ ដោយក្នុងនោះរដ្ឋធានី ឡាប៉ាស (La Paz) រងផលប៉ះពាល់ខ្លាំងជាងគេ។ ប្រជាជនចំនួន ៩.៦២៥ គ្រួសារ បានរងផលប៉ះពាល់ និងរងគ្រោះដោយសារបញ្ហាអាកាសធាតុដ៏អាក្រក់នេះ»។

លោក កាលវីម៉ុនតេស បាននិយាយថា ទីក្រុង ឡាអាសុនតា (La Asunta) ក្រុង ទីព័រនី (Tipuani) និងក្រុង អ៊ីរ៉ុប៉ាណា (Irupana) នៅរដ្ឋធានី ឡាប៉ាស ក៏ដូចជាទីប្រជុំជន កូតាហ្គៃតា (Cotagaita) នៅទីក្រុង ប៉ូតូស៊ី (Potosi) ត្រូវបានប្រកាសថាជាតំបន់ «រងគ្រោះមហន្តរាយ» ដោយបន្ថែមថាទីក្រុង វ័រការ៉ាហេ (Huacaraje) និងទីក្រុង ទ្រីនីដាដ (Trinidad) ក្នុងតំបន់បេនី (Beni) ត្រូវបានប្រកាសដាក់ក្នុង «ភាពអាសន្ន»។

មកទល់ពេលនេះ ក្រុងចំនួន ៤៤ បានរងផលប៉ះពាល់ដោយទឹកជំនន់ដែលបណ្ដាលមកពីភ្លៀងធ្លាក់ខ្លាំង ហើយលោករដ្ឋមន្ត្រីរូបនេះបាននិយាយថា រដ្ឋាភិបាលជាតិបានផ្តល់ជំនួយមនុស្សធម៌ចំនួន ១៣១តោនទៅដល់គ្រួសាររងគ្រោះទាំងនោះ៕