មន្ទីរបញ្ចកោណ មិនឃើញសង្រ្គាមអ៊ីស្រាអែល-ក្រុមហាម៉ាសថា បានរីករាលដាលដល់មជ្ឈិមបូព៌ាកាន់តែធំទេ បើទោះបីជាមានការវាយប្រហារជាថ្មីដោយកងជីវពលគាំទ្រដោយអ៊ីរ៉ង់ ដែលបានសម្លាប់ទាហានអាមេរិកបីនាក់ និងរាប់សិបនាក់ផ្សេងទៀត រងរបួសនៅឯមូលដ្ឋានយោធាមួយ ក្នុងប្រទេសហ្ស៊កដានី កាលពីចុងសប្តាហ៍ក៏ដោយ។

ចាប់តាំងពីថ្ងៃទី១៧ ខែតុលាមក សម្ព័ន្ធភាពដ៏ធូររលុងនៃក្រុមជីវពលដែលគាំទ្រដោយអ៊ីរ៉ង់ បានប្រព្រឹត្តការវាយប្រហារច្រើនជាង ១៦០លើកលើគោលដៅរបស់សហរដ្ឋអាមេរិក នៅក្នុងប្រទេសអ៊ីរ៉ាក់ និងស៊ីរី។ ក្រុមទាំងនោះ និយាយថា ការវាយប្រហារនេះគឺ ជាការសងសឹកចំពោះការគាំទ្ររបស់សហរដ្ឋអាមេរិកចំពោះអ៊ីស្រាអែល ក្នុងការវាយលុកដែលកំពុងបន្តប្រឆាំងនឹងក្រុមសកម្មប្រយុទ្ធហាម៉ាស នៅក្នុងតំបន់ហ្កា ហ្សា។

ការវាយប្រហារចុងក្រោយបង្អស់ក្នុងប្រទេសហ្ស៊កដានី បានបង្ហាញពីការកើនឡើងនៃអំពើហិង្សា ព្រោះវាជាលើកដំបូង ដែលទាហានអាមេរិក ត្រូវបានសម្លាប់ ក៏ដូចជាការពង្រីកលទ្ធភាពផងដែរ។

កាលពីថ្ងៃចន្ទ លេខាធិការរងទទួលបន្ទុកផ្នែកព័ត៌មានរបស់មន្ទីរបញ្ចកោណ អ្នកស្រី សាប្រ៊ីណា ស៊ីង ( Sabrina Singh) បាននិយាយថា វាមិនមែនជាទស្សនៈរបស់មន្ទីរបញ្ចកោណ ដែលថាសង្រ្គាមអ៊ីស្រាអែល និងក្រុមហាម៉ាស កំពុងរីករាលដាល ហួសពីតំបន់ហ្កាហ្សានោះទេ។

អ្នកស្រីស៊ីង បានថ្លែងថា៖«ខ្ញុំនឹងមិននិយាយថា ជម្លោះកំពុងរីករាលដាល នៅក្នុងតំបន់ដែលយើងបានឃើញទេ... ការវាយប្រហារជាង ១០០លើកលើកងកម្លាំងសហរដ្ឋអាមេរិក នៅក្នុងប្រទេសអ៊ីរ៉ាក់ និងស៊ីរី ហើយជាការពិតណាស់ ឥឡូវនេះនៅហ្ស៊កដានី ។ «យើងមិនចង់ឃើញការរីករាលដាលនៃជម្លោះនេះទេ។ យើងមិនឃើញជម្លោះនេះ រីកធំឡើងនោះទេ ព្រោះថា វានៅតែស្ថិតក្នុងតំបន់ហ្កាហ្សានៅឡើយ។