អ្នកនាំពាក្យក្រសួងការបរទេសចិន លោក Wang Wenbin នៅថ្ងៃអង្គារ (ទី៣០ ខែមករា) នេះ បាននិយាយថា ប្រទេសចិនអំពាវនាវឲ្យបញ្ឈប់ការវាយប្រហារលើនាវាស៊ីវិល នៅសមុទ្រក្រហម។

ហើយលោក Wang បានជំរុញឲ្យបញ្ចប់យ៉ាងឆាប់រហ័ស ចំពោះជម្លោះប៉ាឡេស្ទីន-អ៊ីស្រាអែលដែលកំពុងបន្តនៅក្នុងតំបន់ហ្កាហ្សាស្ទ្រីប ដែលបានមើលឃើញថា ភាពតានតឹងបានរីករាលដាលដល់សមុទ្រក្រហម។

ក្នុងសន្និសីទសារព័ត៌មានដែលតែងធ្វើជាប្រចាំ នៅទីក្រុងប៉កាំង លោក Wang បានបា្រប់ថា៖ «សមុទ្រក្រហមគឺជាផ្លូវពាណិជ្ជកម្មអន្តរជាតិដ៏សំខាន់ សម្រាប់ដឹកជញ្ជូនទំនិញ និងថាមពល។ យើងសង្ឃឹមថា នឹងជៀសវាងឲ្យបាននូវភាពតានតឹង នៅក្នុងសមុទ្រក្រហម ហើយអំពាវនាវឲ្យបញ្ឈប់ការវាយប្រហារលើនាវាស៊ីវិល។ យើងគាំទ្រការគោរពអធិបតេយ្យភាពរបស់ប្រទេស នៅតាមបណ្តោយសមុទ្រក្រហម ក្នុងណោះរួមទាំងប្រទេសយេម៉ែនផងដែរ ហើយប្តេជ្ញាធ្វើការយ៉ាងសកម្មជាមួយភាគីទាំងអស់ ដើម្បីបន្ធូរបន្ថយភាពតានតឹងនៅសមុទ្រក្រហម។ ការកើនឡើងនូវស្ថានភាពតានតឹង នៅសមុទ្រក្រហម គឺស្ថិតក្នុងដើមហេតុរីករាលដាលពីជម្លោះនៃតំបន់ហ្កាហ្សា។ ការបញ្ចប់ជម្លោះនៅតំបន់ហ្កាហ្សាឲ្យបានលឿន រួមចំណែកដល់ការបន្ធូរបន្ថយភាពតានតឹង នៅសមុទ្រក្រហមជាមិនខាន»។ 

លោក Wang បានបញ្ជាក់បន្ថែមថា៖ «យើងជំរុញឲ្យគ្រប់ភាគីពាក់ព័ន្ធ ក្នុងជម្លោះនៅតំបន់ហ្កាហ្សា អនុវត្តសេចក្ដីសម្រេចពាក់ព័ន្ធរបស់ក្រុមប្រឹក្សាសន្តិសុខ និងមហាសន្និបាតអង្គការសហប្រជាជាតិ ហើយបញ្ឈប់ជាបន្ទាន់នូវអរិភាព ហើយអំពាវនាវឲ្យសហគមន៍អន្តរជាតិសម្របសម្រួលសកម្មភាព ក្នុងរឿងនេះ»៕