អ្នកនយោបាយជាតិនិយមរុស្ស៊ីលោក Sergei Baburin ដែលបានប្រកាសពីបេក្ខភាពរបស់លោក នៅក្នុងការបោះឆ្នោតជ្រើសរើសប្រធានាធិបតីដែលគ្រោងធ្វើនៅថ្ងៃទី១៥ ដល់ថ្ងៃទី១៧ ខែមីនា បាននិយាយ នៅអង្គារ (ទី៣០ ខែមករា) នេះថា លោកកំពុងដកខ្លួនចេញពីការប្រកួតប្រជែងនេះ ហើយគាំទ្រអ្នកកាន់អំណាចបច្ចុប្បន្ន គឺលោក Vladimir Putin។

លោក Baburin មេដឹកនាំគណបក្សសហភាពប្រជាជនរុស្ស៊ី បានប្រកាសពីការផ្លាស់ប្តូរចិត្តរបស់លោកភ្លាមៗ បន្ទាប់ពីបានបញ្ជូនឯកសារ និងហត្ថលេខាទៅគណៈកម្មាធិការកណ្តាលរៀបចំការបោះឆ្នោត ដើម្បីគាំទ្រដល់ការស្នើឈរឈ្មោះរបស់លោក។

នៅក្នុងវីដេអូដែលចេញផ្សាយដោយសារព័ត៌មានអនឡាញ SOTA លោក Baburin បាននិយាយថា វានឹងជាការខុសឆ្គងក្នុងការបំផ្លាញឯកភាពជាតិ «នៅក្នុងពេលវេលាដ៏លំបាកសម្រាប់ជាតិមាតុភូមិ» ដោយការលើកឡើងនេះសំដៅទៅលើសង្រ្គាម នៅប្រទេសអ៊ុយក្រែន។

លោកបានអំពាវនាវឲ្យប្រជាជនរុស្ស៊ីស្នេហាជាតិទាំងអស់ រួបរួមគ្នានៅជុំវិញលោក Putin ដែលជ័យជម្នះរបស់លោកណៅក្នុងការបោះឆ្នោត ត្រូវបានសន្មតជាការសន្និដ្ឋានទុកមុន ដោយអ្នកគាំទ្រ និងគូប្រជែងដូចគ្នា។ នៅក្នុងការបោះឆ្នោតប្រធានាធិបតីលើកចុងក្រោយរបស់ប្រទេសរុស្ស៊ី ក្នុងឆ្នាំ២០១៨ លោក Baburin បានស្ថិតនៅលំដាប់ក្រោយគេ ក្នុងចំណោមបេក្ខជន ៨នាក់ ដោយទទួលបានសំឡេងឆ្នោតគាំទ្រ ០,៦៥ភាគរយ៕