កំពង់ឆ្នាំង ៖ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះបានថ្លែងថា ក្រសួងការពារជាតិកម្ពុជាកំពុងធ្វើការសិក្សាបន្ថែមទៀតក្នុងការទិញដ្រូនស៊ើបការសម្ងាត់រយៈពេលវែងពីក្រុមហ៊ុនចិនមួយ ក្រោយមើលឃើញពីសារសំខាន់របស់ដ្រូននេះ ក្នុងកិច្ចការពារជាតិនាពេលអនាគត។

ថ្លែងប្រាប់អ្នកសារព័ត៌មានបន្ទាប់ ពីទស្សនា ការបង្ហាញ និងការបង្ហោះដ្រូន ធុន CW-15 and CW-40 (ប្រភេទអាកាសយាន្តគ្មានមនុស្សបើក)ពីសំណាក់របស់ ក្រុមហ៊ុនចិន China National Aero-Technology Import & Export Corporation (CATIC) នៅព្រលានយន្តហោះ ខេត្តកំពង់ឆ្នាំងនាថ្ងៃទី៣១ ខែមករា ឆ្នាំ២០២៤នេះ នាយឧត្តមសេនីយ៍ ឥត សារ៉ាត់ បានបញ្ជាក់ថា បច្ចុប្បន្ននេះ ការវិវត្តន៍រីក ចម្រើន នៃបច្ចេកវិទ្យាមានសន្ទុះយ៉ាងលឿនមិនអាចប៉ាន់ស្មានបាន ជាពិសេសបច្ចេកវិទ្យាដ្រូន បានបម្រើ ឲ្យសេចក្តីត្រូវការរបស់មនុស្សជាច្រើន ក្នុងគោលដៅស៊ីវិល និងយោធា ក្នុងនោះការបម្រើការងារជាយោធា ដូចជា ការស៊ើបការណ៍ ការវាយកម្ទេច ការទប់ទល់គ្រប់ស្ថានភាព និងគ្រប់អាកាសធាតុជាដើម ហើយការ រីកចម្រើននៃបច្ចេកវិទ្យាមួយនេះ បានវិវត្តឥតឈប់ឈរពីមួយថ្ងៃទៅមួយថ្ងៃ កត្តានេះហើយបានធ្វើឲ្យ បណ្តាប្រទេសជាច្រើន បានខិតខំពង្រឹងពង្រីកគ្រឿងបំពាក់ដ្រូនតាមសេចក្តីត្រូវការជាក់ស្តែងរបស់ខ្លួន ហើយក្រៅពីនោះ ក៏បានដាក់ចេញនូវវិធានការគ្រប់គ្រងដោយច្បាប់ ទាំងការផលិត ការនាំចូល និងការប្រើ ប្រាស់ព្រមទាំងរៀបចំគ្រឿងបំពាក់ក្នុងការទប់ស្កាត់ដ្រូនគ្រប់ប្រភេទទៀតផង។

 នាយឧត្តមសេនីយ៍ ឥត សារ៉ាត់ បានបញ្ជាក់ថាបញ្ហាដ្រូននេះ«វាគឺជាទុនមួយដើម្បីឲ្យកងយោធ ពលខេមរភូមិន្ទរបស់យើងធ្វើការសិក្សាអំពីបច្ចេកទេសដ្រូននេះ …បញ្ហាបច្ចេកទេសដ្រូននេះគឺដើរតួយ៉ាង សំខាន់ណាស់អញ្ចឹងហើយ ក្នុងបញ្ហាសង្រ្គាមបច្ចុប្បន្នការប្រើប្រាស់ដ្រូននេះគឺយើងឃើញថាគ្រប់ទាំងយុទ្ធ សាស្រ្ត យុទ្ធវិធីទាំងពេលយប់ពេលថ្ងៃគឺដ្រូនបានដើរតួយ៉ាងសំខាន់ណាស់ ដូច្នេះហើយការធ្វើបទបង្ហាញ នាថ្ងៃនេះ គឺបានធ្វើឲ្យយើងចាប់អារម្មណ៍មួយអំពីបញ្ហាដ្រូននេះ។ យើងនឹងធ្វើការសិក្សាបន្តទៀតថាតើក្នុង កងយោធពលខេមរភូមិន្ទយើងគួរ កសាងកងទ័ពជំនាញដ្រូននេះរបៀបណា យើងកំពុងរៀបចំជាផែនការ និងទិសដៅរបស់យើង….ហើយយើងនឹងខិតខំកសាងនាទៅអនាគត»។

នាយឧត្តមសេនីយ៍ ឥត សារ៉ាត់ ក៏បានលើកឡើងផងដែរថា ដើម្បីបង្ហាញអំពីបច្ចេកវិទ្យារបស់ សាធារណរដ្ឋប្រជាមានិតចិន ជាពិសេសបច្ចេកវិទ្យាដ្រូនដែលមានការរីកចម្រើនយ៉ាងលឿន ហើយដ្រូនក៏ មានច្រើនប្រភេទផងដែរ ដែលអាចប្រើប្រាស់គ្រប់ស្ថានភាពទាំងយុទ្ធាសាស្រ្ត និងយុទ្ធវិធី និងដើម្បីកសាង សមត្ថភាពកងទ័ពកម្ពុជាទាំងមូល អំពីបច្ចេកវិទ្យាដ្រូនក្នុងការបំពេញភារកិច្ច ការពារជាតិ មាតុភូមិ និងសន្តិ សុខជាតិ ទទួលបានជោគជ័យថែមទៀតនោះ នាយឧត្តមសេនីយ៍នាយសេនាធិការចម្រុះ ក៏បានសំណូម ពរអគ្គនាយកដ្ឋានសម្ភារបច្ចេកទេស ក្រសួងការពារជាតិ បន្តទំនាក់ទំនងជាមួយភាគីចិនបន្ថែមទៀត ដើម្បី សិក្សាអំពីសេចក្តីត្រូវការដ្រូន សម្រាប់បម្រើឲ្យកងយោធពលខេមរភូមិន្ទ ក្នុងភារកិច្ចការពារបូរណភាពទឹក ដី ការពារសន្តិសុខជាតិ ទាំងក្នុងពេលបច្ចុប្បន្ន និងអនាគត។

 សូមបញ្ជាក់ថា ដ្រូនដែលបានធ្វើការបង្ហាញនាថ្ងៃនេះ គឺជាប្រភេទដ្រូនស៊ើបការណ៍សម្ងាត់បំផុត ដោយវាអាចហោះពីលើផ្ទៃដីបានចម្ងាយបីរយគីឡូម៉ែត្រ និងហោះបានចំនួន១០០គីឡូម៉ែត្រក្នុង១ម៉ោង និង២០នាទី ហើយពិសេសថែមទៀតនេះដ្រូនប្រភេទនេះអាចចាប់បានគោលដៅ និងទីតាំងច្បាស់លាស់ ស្របទៅតាមសភាពការណ៍ជាក់ស្តែងជាដើម៕ អត្ថបទ ៖ បាន ចក់