ដោយដាក់ការសង្ស័យថ្មីលើការសន្យាបំពាក់សព្វាវុធរបស់ប្រទេសអាល្លឺម៉ង់ ទស្សនាវដ្តីព័ត៌មាន Spiegel បានរាយការណ៍ថា យោធាអាល្លឺម៉ង់កំពុងសម្លឹងដល់ឱនភាព ៥៦ពាន់លានអឺរ៉ូ (៦១ពាន់លានដុល្លារ) ក្នុងឆ្នាំ២០២៨ នៅពេលដែលមូលនិធិពិសេសរបស់ខ្លួន សម្រាប់ការចំណាយលើវិស័យការពារជាតិ ត្រូវអស់។

អាល្លឺម៉ង់បានបង្កើតមូលនិធិពិសេសចំនួន ១០០ពាន់លានអឺរ៉ូ ដើម្បីទិញសព្វាវុធទំនើប ហើយបានសន្យាថា នឹងឈានឲ្យដល់គោលដៅរបស់អង្គការណាតូ (NATO) ក្នុងការចំណាយយ៉ាងហោចណាស់ ២ភាគរយនៃផលិតផលក្នុងស្រុកសរុប ឬGDP លើវិស័យការពារេជាតិ ដែលជាផ្នែកនៃការផ្លាស់ប្តូរគោលនយោបាយដ៏សំខាន់ ក្នុងការឆ្លើយតបទៅនឹងការលុកលុយរបស់រុស្ស៊ីលើអ៊ុយក្រែន។

បរិមាណដែលបាត់ ដែលទស្សនាវដ្ដី Spiegel បានរាយការណ៍ថា បានមកពីការវិភាគផ្ទៃក្នុងនៃតម្រូវការហិរញ្ញវត្ថុពីក្រសួងការពារជាតិនោះ គឺផ្អែកលើការសន្មត់ថា ២ភាគរយនៃផលិតផលក្នុងស្រុកសរុប ក្នុងឆ្នាំ២០២៨ នឹងមានប្រហែល ៩៧ពាន់លានអឺរ៉ូ។ ទស្សនាវដ្ដី Spiegel បានរាយការណ៍ថា មន្ត្រីក្រសួងការពារជាតិរំពឹងថា នឹងត្រូវការប្រាក់បន្ថែម ១០,៨ពាន់លានអឺរ៉ូបន្ថែមពីលើនោះ ដើម្បីបំពេញតម្រូវការចំណាយរបស់កងទ័ព។

របាយការណ៍បានឲ្យដឹងថា តែទោះបីជាយ៉ាងណាក្ដី ថវិកាការពារជាតិធម្មតាត្រូវបានគេរំពឹងថា នឹងនៅតែស្ថិតក្នុងកម្រិតបច្ចុប្បន្ន ដែលមានចំនួនប្រហែល ៥១,៩ពាន់លានអឺរ៉ូ ក្នុងឆ្នាំ២០២៨។ ក្រសួងការពារជាតិមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយតាមសារអេឡិកត្រូនិក (អ៊ីម៉ែល)៕