នៅក្នុងឱកាសបុណ្យចូលឆ្នាំថ្មីប្រពៃណីចិន វៀតណាម ជិតឈានចូល​មកដល់នា​ពេល​ខាង​មុខ​នេះ មានប្រជាពលរដ្ឋខ្មែរកាត់សែចិនបាននាំគ្នាអញ្ជើញទៅធ្វើពិធីសែនកាត់ឆុង កាត់គ្រោះផ្សេងៗ សុំ​សេចក្តីសុខចម្រើនក្នុងឱកាសចូលឆ្នាំថ្មីខាងមុខនេះ នៅរោងវិហារអ្នកតាចិន លោកតាព្រះចៅ នៃ​ទីតាំងរមណីយដ្ឋានវត្តភ្នំ រាជធានីភ្នំពេញ។

ពលរដ្ឋថ្លែងប្រាប់ BTV នៅថ្ងៃទី១ ខែកុម្ភៈថា ការនាំគ្នាមកធ្វើពិធីសែនកាត់ឆុង កាត់គ្រោះ ក្នុង​ឱកាស​បុណ្យ​ចូលឆ្នាំថ្មីប្រពៃណីចិនវៀតណាមជិតឈានមកដល់ខាងមុខនេះ គឺពលរដ្ឋ​បាន​ធ្វើ​ជា​ទម្លាប់​រៀង​រាល់ឆ្នាំ។ ការសែនកាត់គ្រោះនេះ ពលរដ្ឋបានទិញគ្រឿងសែន ធូបទៀន សាច់ជ្រូក​បីជាន់ ពងទា២គ្រាប់ ក្រដាស់សែនកាត់ឆុង និងផ្លែឈើនានា យកទៅថ្វាយទេវរាជ លោក​តា​ព្រះ​ចៅ​ក្រុង ដាក់មាត់រូបសំណាកខ្លា ទៅតាមលទ្ធភាព និងតាមសទ្ធារបស់ខ្លួន។ ការធ្វើពីធីសែននេះ ពលរដ្ឋ​ក៏​បានបួងសួងសុំឲ្យមានការខិតខំប្រកបរបរការងារ ការធ្វើអាជីវកម្ម រកស៊ីនានា​ក្នុង​ឆ្នាំថ្មី​នេះ​មាន​ការរីកចម្រើន ជោគជ័យផងដែរ។

លោក ចាន់ វឿន តំណាងអ្នករៀបចំដឹកនាំពិធីសែន នៅរមណីយដ្ឋានវត្តភ្នំ បានឱ្យដឹងថា ពលរដ្ឋ​ដែល​មក​ធ្វើ​ពិធីសែននៅទីនេះ គឺមានអ្នកខ្លះមកធ្វើពិធីសែនកាត់ឆុង កាត់គ្រោះ ទៅតាម​ឆ្នាំ​កំណើត​របស់​ពួកគេ ហើយខ្លះទៀត ក៏បានមកធ្វើពិធីសែន អរគុណអ្នកតាចិន ដែលបានជួយ​ឱ្យ​រក​ស៊ី​មាន​បានក្នុងឆ្នាំកន្លងមកផងដែរ។

សូមជម្រាបថាពិធីបុណ្យចូលឆ្នាំថ្មីប្រពៃណីចិនវៀតណាម នឹង​ឈាន​ចូល​មក​ដល់​នៅសប្តាហ៍​ក្រោយ​នេះ ហើយការធ្វើពិធីបួងសួងសែនកាត់ឆុងក្នុងឱកាសថ្ងៃឆ្លងឆ្នាំថ្មីនេះ ក្រៅពីរមណីយដ្ឋាន​វត្ត​ភ្នំ គេក៏សង្កេតឃើញមាននៅតាមរោងអ្នកតាចិននានាផ្សេងទៀតដែរ ជាពិសេស​នៅ​រោង​អ្នក​តាចិន​នៅ​ក្រុងតាខ្មៅ ខេត្តកណ្តាល ក៏មានពលរដ្ឋអញ្ជើញទៅធ្វើពិធីសែនដូចគ្នានេះ តែមិន​សូវ​មាន​មនុស្ស​ចូលរួមច្រើនកុះករដូចនៅរមណីយដ្ឋានវត្តភ្នំនេះទេ៕ អត្ថបទ៖ ស៊ុម សុខជា