ក្រសួងអប់រំ យុវជន និងកីឡា នៅព្រឹកថ្ងៃទី១ ខែកុម្ភៈ ឆ្នាំ២០២៤នេះ បានរៀប​ចំ​កម្ម​វិធី​ផ្សព្វ​ផ្សាយ​ស្តង់ដាសាលារៀនគំរូ និងការលើកកម្ពស់​ស្តង់ដា​សាលា​រៀនគំ​រូ​ដោយ​វិធី​បង្រៀន​តាម​បែប​ថ្នាក់​រៀន​ត្រឡប់ និងវិធីសាស្រ្តបង្រៀនតាមទ្រឹស្តីអប់រំស្ថាបនានិយម ក្នុងគោលដៅជំរុញ​ដល់​ដំណើរ​ការ​បង្រៀន និងរៀនឲ្យកាន់តែមានប្រសិទ្ធភាពខ្ពស់ក្នុងសម័យឌីជីថល។

ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និង​កីឡា នៅក្នុងកម្មវិធីផ្សព្វផ្សាយនេះ បានមានប្រសាសន៍ថា ស្តង់ដារសាលារៀនគំរូ គឺស្តង់ដា​សាលា​មធ្យម​សិក្សាគំរូ មិនសំដៅទៅរកការដាក់វិន័យ ឬទណ្ឌកម្ម ចំពោះនាយក គ្រូបង្រៀន សិស្ស សហគមន៍ ឬអ្នកពាក់ព័ន្ធ ដែលបំពេញការងារមិនបានទាន់ឆ្លើយតបស្តង់ដារទេ ប៉ុន្តែ​ជា​រង្វាស់ ឬមគ្គុទេសក៍ដឹកនាំអ្នកពាក់ព័ន្ធនានាឈានទៅដល់ ឬប្រសើរជាងស្តង់ដារ។

ដើម្បីជំរុញការសម្រេចឲ្យបានស្តង់ដាសាលារៀនគំរូ ឯកឧត្តមបណ្ឌិតសភាចារ្យ បាន​ផ្តល់​អនុសាសន៍​ណែនាំមួ​យចំនួន ទៅកាន់គ្រូបង្រៀនគ្រប់រូប ដែលត្រូវតែចូលរួមជាចាំបាច់ មានដូចជា ស្វែង​យល់បន្ថែមពីយុទ្ធសាស្រ្ត និងចក្ខុវិស័យនៃកំណែទម្រង់វិស័យអប់រំ និង​ជា​ពិសេស​ឯក​សារ​ណែនាំ​សម្រាប់ការអនុវត្ត និងសាកល្បងផលាស់ប្តូរដោយចាប់ផ្តើមចេញពីលទ្ធភាពដែលមាន និង​ដែលអាចអនុវត្តទៅបានភ្លាមជាដើម។

ក្នុងយុទ្ធនាការនេះដែរ លោកស្រី ស្រី សុផាន់នារី នាយិកាសាលាបឋមសិក្សា មិត្តភាព បាន​ប្តេជ្ញា​ចិត្ត​ថា នឹងខិតខំពង្រឹងគុណភាពវិស័យអប់រំនៅតាមសាលារៀនឲ្យកាន់តែរឹងមាំថែមទៀត ជា​ពិសេស​ក្នុង​សម័យសង្គមឌីជីថលនេះ គឺដើម្បីឲ្យមានដំណើរការប្រកបទៅដោយគុណភាព និង​ប្រសិទ្ធ​ភាព សម្រាប់សិស្សានុសិស្សដែលជាទំពាំងស្នងឬស្សីទៅថ្ងៃអនាគត។

សូមជម្រាបថា ការដាក់ឲ្យអនុវត្តស្តង់ដាសាលារៀនគំរូ មានគោលបំណង​លើក​កម្ពស់​កំណែ​ទម្រង់​វិស័យ​អប់រំ​ពី​មត្តេយ្យសិក្សាទៅមធ្យមសិក្សា ហើយគ្របដណ្តប់​លើ​គ្រប់​ទិដ្ឋភាព​ទាំងអស់ នៃ​ការ​អប់រំ ក៏ដូចជាដើម្បីពង្រឹងស្វ័យគ្រប់គ្រងសាលាមធ្យមសិក្សា និងលើក​កម្ពស់​ការ​ផ្តល់​សេវា​អប់រំ​ប្រកប​ដោយ​គុណភាព សមធម៌ បរិយាបន្ន ប្រសិទ្ធភាព និងចីរភាព ដើម្បីផ្តល់ឱកាស​ឲ្យ​សិស្សា​នុសិស្ស​បាន​ប្រកបដោយពុទ្ធិសម្បទា បំណិនសម្បទា និងចរិយាសម្បទា សម្រាប់ជីវិតនិងការងារ និង​ត្រៀមខ្លួនបន្តការសិក្សានៅកម្រិតឧត្តមសិក្សា ឬចូលក្នុងទីផ្សារការងារ។ ដោយឡែក ការអនុវ​ត្ត​ស្តង់ដា​សលារៀនគំរូ បានផ្សារភ្ជាប់ពីការបណ្តុះបណ្តាលគ្រូ ការបណ្តុះបណ្តាលនាយក ការរៀន និង​ការ​បង្រៀននៅសាលារៀន ហើយតម្រង់ការជួយគាំទ្រពីដៃគូអភិវឌ្ឍ អាជ្ញាធរមូលដ្ឋាន ក៏​ដូច​ជា​មាតាបិតា សម្រាប់ការអភិវឌ្ឍសាលារៀន៕ អត្ថបទ៖ ឈិត បូរ៉ាវី