នៅថ្ងៃទី១ ខែកុម្ភៈ ឆ្នាំ២០២៤ នេះ ថ្នាលផ្ទៀងផ្ទាត់ឯកសារ verify.gov.kh របស់កម្ពុជាយើង ដែលបានអភិវឌ្ឍដោយក្រសួងប្រៃសណីយ៍និងទូរគមនាគមន៍ នឹងត្រូវចូលរួមវគ្គផ្តាច់ព្រ័ត្រ ក្នុងកម្មវិធី​ប្រកួត​ប្រជែងកម្រិតតំបន់ ASEAN Digital Awards 2024 ដែលរៀបចំឡើងនៅសិង្ហបុរី។

តាមរយៈ ការប្រកាសលទ្ធផលនៅក្នុងកិច្ចប្រជុំថ្នាក់រដ្ឋមន្ត្រីឌីជីថលអាស៊ាន កម្មវិធី ASEAN Digital Awards 2024 គឺជាកម្មវិធីប្រកួតប្រជែងដ៏ធំនៅក្នុងតំបន់ពាក់ព័ន្ធនឹងឌីជីថល ដែលមាន​ការចូលរួមពីបណ្តាស្ថាប័នរដ្ឋ ក្រុមហ៊ុនឯកជន និងអង្គការសង្គមស៊ីវិល នៅក្នុង​បណ្តាប្រទេស​ទាំងអស់​នៅតំបន់អាស៊ាន ក្នុងគោលបំណងបង្ហាញពីស្នាដៃរបស់ខ្លួន ដែលនឹង​ជំរុញការធ្វើ​បរិវត្ត​កម្ម​ឌីជីថលប្រកបដោយបរិយាបន្ន ហើយចូលរួមក្នុងការលើក​កម្ពស់ការ​ប្រើប្រាស់​បច្ចេកវិទ្យា​ឌីជីថល និងនុវានុវត្តន៍ឌីជីថលនៅក្នុងតំបន់។

សូមបញ្ជាក់ផងដែរថា ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាល ដែលអភិវឌ្ឍដោយ ក.ប.ទ. និងត្រូវបានដាក់ឱ្យប្រើក្នុងគោលបំណ​ងលុបបំបាត់​ការ​ក្លែង​បន្លំ​ឯកសារ ផ្តល់ភាពងាយស្រួលក្នុងការប្រើ និងផ្ទៀងផ្ទាត់ភាពត្រឹមត្រូវនៃឯកសារ ផ្តល់ទំនុកចិត្ត ចំណេញ​ពេលវេលា និងកាត់បន្ថយចំណាយនានា ព្រមទាំងជំរុញការធ្វើបរិវត្តកម្មឌីជីថល ស្រប​តាម​ឧត្តមានុវត្តជាអន្តរជាតិ។ ការផ្ទៀងផ្ទាត់ឯកសារនៅលើ ថ្នាល verify.gov.kh ត្រូវធ្វើឡើង​តាមរ​យៈ​ការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែល​មាន​សុវត្ថិភាពខ្ពស់នៅលើសន្លឹកនៃឯកសារនីមួយៗ។ ទន្ទឹមនឹងនេះ ការប្រើ​ឯកសារ​ដែល​មាន​ដាក់​បញ្ចូល QR Code ស្តង់ដានេះ មិនតម្រូវឱ្យមានការធ្វើនីត្យានុកូលកម្ម លើឯកសារ​ថត​ចម្លង​ក្នុង​ទម្រង់​ជាក្រដាសឡើយ។