ប្រធានាធិបតីហ្វីលីពីនលោក ហ្វឺឌីណាន ម៉ាកូស (Ferdinand Marcos Jr) បានអនុម័តដំណាក់កាលទី៣នៃទំនើបកម្មយោធាដែលរួមមានការទិញនាវាមុជទឹកដំបូងរបស់ប្រទេសនេះ ដើម្បីការពារអធិបតេយ្យភពដែនសមុទ្ររបស់ខ្លួន នៅក្នុងសមុទ្រចិនខាងត្បូង ដែលមានជម្លោះ។

អ្នកនាំពាក្យកងទ័ពជើងទឹកសម្រាប់សមុទ្រហ្វីលីពីនភាគខាងលិច លោក រ៉ូយ ទ្រីនីដាដ (Roy Trinidad) បាននិយាយនៅថ្ងៃព្រហស្បតិ៍នេះថា ដំណាក់កាលទី៣នៃការធ្វើទំនើបកម្ម បានឆ្លុះបញ្ចាំងពីការផ្លាស់ប្តូរយុទ្ធសាស្ត្រឆ្ងាយពីការការពារផ្ទៃក្នុង ទៅខាងក្រៅ។

លោកទ្រីនីដាដ បាននិយាយថា៖«យើងប្រហែលជាមិនមែនជាកងទ័ពជើងទឹកធំទេ... ប៉ុន្តែយើងនឹងមានកងទ័ពជើងទឹកដែលនឹងថែរក្សាសិទ្ធិ និងអធិបតេយ្យភាពទឹកដីរបស់យើង»។

លោកបានបន្តថា ដំណាក់កាលទី៣នៃផែនការទំនើបកម្ម ដែលបានធ្វើការកែសម្រួល ដើម្បីធ្វើឲ្យវាកាន់តែសមស្របទៅនឹងតម្រូវការរបស់ប្រទេស ត្រូវបានគេប៉ាន់ប្រមាណថា នឹងត្រូវចំណាយអស់ ២ពាន់ពាន់លានប៉េសូ (៣៥,៦២ ពាន់លានដុល្លារ) ហើយនឹងត្រូវអនុវត្តក្នុងរយៈពេលជាច្រើនឆ្នាំ។

ការប្រកាសនេះ ធ្វើឡើងនៅពេលដែលមានភាពតានតឹងកាន់តែខ្លាំងជាមួយចិនជុំវិញជម្លោះទឹកដីនៅសមុទ្រចិនខាងត្បូង។ ទីក្រុងម៉ានីល និយាយសំដៅទៅលើផ្នែកនោះនៃសមុទ្រចិនខាងត្បូង នៅក្នុងតំបន់សេដ្ឋកិច្ចផ្តាច់មុខរបស់ខ្លួន ជាសមុទ្រហ្វីលីពីនខាងលិច។