ក្រុមកាងារក្រសួងកសិកម្ម នៅថ្ងៃទី២ ខែកុម្ភៈនេះ បានអញ្ជើញចុះត្រួតពិនិត្យទីតាំងបើកវគ្គបណ្តុះបណ្តាលដំបូង ពាក់ព័ន្ធរបៀបធ្វើការងារទូទៅជូនមន្ត្រីកសិកម្មឃុំ ២៥០ នាក់ នៅសកលវិទ្យាល័យភូមិន្ទកសិកម្មចំការដូង ដែលការបណ្តុះបណ្តាលដំបូងនេះនឹងរៀបចំនៅថ្ងៃទី៥ ខែកុម្ភៈសប្តាហ៍ក្រោយនេះ។
លោក ទី ចាន់ណា ប្រធាននាយកដ្ឋានបុគ្គលិក និងអភិវឌ្ឍន៍ធនធានមនុស្ស នៃក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់ BTV នៅថ្ងៃទី២ ខែកុម្ភៈនេះថា កាលពីចុងឆ្នាំ ២០២៣ កន្លងមកនេះ ក្រសួងមុខងារសាធារណៈ និងក្រសួងកសិកម្ម បានសហការរៀបចំប្រឡងប្រជែងជ្រើសរើសមន្ត្រីកសិកម្មឃុំចំនួន ២៥០ នាក់រួចហើយ នៅសប្តាហ៍ក្រោយនេះ ក្រសួងកសិកម្មនឹងអញ្ជើញបេក្ខជនបេក្ខនារីដែលទើបប្រឡងជាប់ក្របខ័ណ្ឌមន្ត្រីកសិកម្មឃុំទាំងនោះ មកទទួលការបណ្តុះបណ្តាលដំបូងទាក់ទងនឹងការងារទូទៅរបស់ក្រសួងកសិកម្ម និងតួនាទីភារកិច្ចមន្ត្រីកសិកម្មឃុំការរបៀបធ្វើការងារនានាទៀត មុននឹងបញ្ជូនមន្ត្រីកសិកម្មឃុំទៅបំពេញតួនាទីរបស់ខ្លួនធ្វើការងារជាមួយកសិករនៅតាមឃុំគោលដៅរបស់គេ។
លោក ទី ចាន់ណា បន្តថា បន្ទាប់ពីមន្ត្រីកសិកម្មឃុំទទួលការបណ្តុះបណ្តាលដំបូងរយៈពេល១០ថ្ងៃរួចហើយ ក្រសួងកសិកម្ម និងសហការជាមួយក្រសួងប្រៃសណីយ៍ទូរគមនាគមន៍ និងស្ថាប័ននានាទៀត ផ្តល់ការបណ្តុះបណ្តាលរបៀប និងវិធីសាស្ត្រធ្វើការងារផ្សព្វផ្សាយកសិផលជូនកសិករ បណ្តុះបណ្តាលការប្រើប្រាស់ប្រព័ន្ធបច្ចេកវិទ្យាទំនើប បណ្តុះបណ្តាលរបៀបប្រមូលទិន្នន័យស្ថិតិ បច្ចេកទេសកសិកម្មដំណាំស្រូវ ដាំដំណាំង ផលិតកម្មសត្វ វារីវប្បកម្ម និងសហគមន៍កសិកម្មទំនើបជាដើម។
ឯកឧត្តម យង់ សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ថ្លែងថា ក្នុងរយៈពេលមួយខែពេញនេះ ក្រសួងកសិកម្ម នឹងផ្តល់ការបណ្តុះបណ្តាលការងារច្រើនមុខជំនាញជូនមន្ត្រីកសិកម្មឃុំ ហើយចាប់ពីខែមីនានេះក្រសួងនឹងដាក់ពង្រាយមន្ត្រីជំនាញកសិកម្មទាំង ២៥០នាក់ទៅតាមឃុំគោលដៅរបស់គេ។
ឯកឧត្តម យង់ សាំងកុមារ ថ្លែងថា ជារួមមន្ត្រីកសិកម្មឃុំមានតួនាទីសំខាន់ ជាអ្នកសម្របសម្រួលច្រើនជាងការងារបច្ចេកទេស ហើយពួកគេនឹងធ្វើការងារកំណត់បញ្ហាប្រឈមរបស់កសិករ លើកបញ្ហាប្រឈមទាំងនោះជូនស្ថាប័នជំនាញដោះស្រាយ ហើយនឹងត្រូវធ្វើការងារសម្របសម្រួលដឹកនាំការអនុវត្តដោះស្រាយបញ្ហាប្រឈមជូនកសិករ សម្របសម្រួលការផ្សារភ្ជាប់កសិផលរបស់កសិករទៅនឹងទីផ្សារ និងបង្កើនប្រាក់ចំណូល ជំរុញកំណើនសេដ្ឋកិច្ច និងមានភាពធន់នឹងការប្រែប្រួលអាកាសធាតុជាដើម៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
