អ្នកនាំពាក្យអង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ច្រករបៀងសុវត្ថិភាពដែលកងកម្លាំងរក្សាសន្តិភាពរបស់អង្គការសហប្រជាជាតិ បានបង្កើតឡើងនៅសាធារណរដ្ឋប្រជាធិបតេយ្យកុងហ្គោ (DRC)ភាគខាងកើត បានជួយសង្គ្រោះជនស៊ីវិលជាង ១ពាន់នាក់ ពីការប៉ះទង្គិចគ្នាធ្ងន់ធ្ងរ។ លោក Dujarric បាននិយាយថា ច្រករបៀងនៅខេត្ត North Kivu បានអនុញ្ញាតឱ្យ បុរស ស្ត្រី និងកុមារ ជាង ១ពាន់នាក់ភៀសខ្លួនចេញពីលំនៅឋាន ទៅកាន់ទីសុវត្ថិភាព។ លោក និយាយថា កងកម្លាំងរក្សាសន្តិភាព មកពីបេសកកម្មរបស់អង្គការសហប្រជាជាតិនៅក្នុងប្រទេសកុងហ្គោ(DRC) ត្រូវបានដាក់ពង្រាយទៅកាន់ខេត្ត North Kivu និងបានបង្កើតមូលដ្ឋានបណ្តោះអាសន្ននៅក្រុង វ៉េសូ(Mweso) សម្រាប់ច្រករបៀងមនុស្សធម៌ មុនអំឡុងពេលប្រយុទ្ធគ្នារវាងក្រុមឧទ្ទាម M23 និងកងកម្លាំងប្រដាប់អាវុធ កុងហ្គោ។លោក Dujarric បាននិយាយថា បេសកកម្មរបស់អង្គការសហប្រជាជាតិ ក៏កំពុងបន្តការពារ និងផ្តល់ជំនួយផ្នែកវេជ្ជសាស្រ្តដល់សហគមន៍ជនភៀសខ្លួន ដែលកំពុងជ្រកកោននៅជិតមូលដ្ឋានរបស់ខ្លួនក្នុងទីក្រុង គិតចាងហ្គា(Kitchanga) មានចម្ងាយប្រហែល ១៥ គីឡូម៉ែត្រ ពីក្រុង Mweso។ 

គេហទំព័រជំនួយសង្គ្រោះរបស់ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិបាននិយាយថា ខេត្ត North Kivu គឺជាចំណុចកណ្តាលនៃការប៉ះទង្គិចគ្នាដោយហិង្សា រវាងកងទ័ពកុងហ្គោ និងក្រុមឧទ្ទាម M23 ដោយយ៉ាងហោចណាស់ជនស៊ីវិល ១៩ នាក់ស្លាប់ និង ២៧ នាក់រងរបួស។

អ្នកនាំពាក្យបាននិយាយថា ផលប៉ះពាល់មនុស្សធម៌នៃការកើនឡើងអំពើហិង្សាចុងក្រោយ បានធ្វើឱ្យមានការភ័យខ្លាច។ បុរស ស្ត្រី និងកុមារប្រមាណ ៨.០០០នាក់ ត្រូវបានជម្លៀសខ្លួន និងស្វែងរកទីជម្រកនៅជិតមន្ទីរពេទ្យក្រុង Mweso។ លោក Dujarric បាននិយាយថា មនុស្ស ២៥០.០០០នាក់ នៅក្នុងក្រុង Mweso ត្រូវការជំនួយមនុស្សធម៌បន្ទាន់ និងបាននិយាយថា មានជនស៊ីវិលរាប់សិបនាក់បានស្លាប់និងរងរបួស។