អាជ្ញាធរ និងប្រជាពលរដ្ឋប្តេជ្ញាថានឹងចូលរួមទប់ស្កាត់ការបំពុលខ្យល់ ក្នុងបរិយាកាស ដោយ​អនុវត្ត​តាម​សេចក្តីជូនដំណឹងរបស់ក្រសួងបរិស្ថាន។

លោកស្រី សឿង សេរី ចៅសង្កាត់ដង្កោ ខណ្ឌដង្កោ រាជធានីភ្នំពេញ នៅថ្ងៃទី០៥ ខែកុម្ភៈនេះ បាន​ប្រាប់​BTV​ឱ្យដឹងថា ដើម្បីទប់ស្កាត់ការបំពុលខ្យល់សាធារណៈ អាជ្ញាធរមូលដ្ឋានបានផ្សព្វផ្សាយ និង​អប់រំ​ប្រជាពលរដ្ឋ​មិន​ឱ្យដុតសំរាម​ផ្តេសផ្តាស​ដែលជាហេ​តុ​បង្ក​ឱ្យមា​ន​ការ​បំពុល​ទៅ​ក្នុង​បរិយាកាស​ និងបានសំអាតអនាម័យនៅតាមដងផ្លូវសាធារណៈជាដើម។ លើសពីនេះ លោក​ស្រី​បាន​​អំពាវនាវដល់ប្រជាពលរដ្ឋត្រូវចូលរួមអនុវត្តតាមសេចក្តីជូនដំណឹងរបស់ក្រសួងបរិស្ថាន ស្តីពី​វិធានការទប់ស្កាត់ និងកាត់បន្ថយការបំពុលខ្យល់សាធារណៈ បើទោះបីបច្ចុប្បន្ន​នៅ​ក្នុង​ប្រទេស​កម្ពុជា​​មិ​នទាន់មានការបំពុលខ្យល់ក្តី។

ប្រជាពលរដ្ឋប្តេជ្ញាថា នឹងចូលរួមទប់ស្កាត់ការបំពុលខ្យល់សាធារណៈ ដោយ​អនុវត្ត​តាម​សេចក្តី​ជូន​ដំណឹង​របស់ក្រសួងបរិស្ថាន ហើយបន្តផ្សព្វផ្សាយសេចក្តីជូនដំណឹងនេះ ទៅកាន់​បង​ប្អូន​នៅ​ស្រុក​ស្រែ​ចំកា​រមិនឱ្យដុតសំរាម ព្រៃឈើ និងដុតស្មៅជាដើម។

យោងតាមសេចក្តីជូនដំណឹងរបស់ក្រសួងបរិស្ថានចេញផ្សាយនៅពេលថ្មីៗនេះ បានឱ្យដឹងថា បច្ចុប្បន្ន​គុណភាពខ្យល់នៅប្រទេសកម្ពុជា មានភាពល្អប្រសើរ ដោយកម្រិតភាគល្អិតនិចល PM 2.5 ស្ថិតចន្លោះពី ១៨,០៣ µg/m3 ទៅ ២១,៤៣ µg/m3 ដែលទាប​ជាង​កម្រិត​ស្តង់​ដារ​កំណត់ ​គឺ ៥០ µg/m3 ។ យ៉ាងណាក្តី ដើម្បីធានា​បាន​នូវ​ការ​ទប់ស្កាត់កា​រ​បំពុល​ខ្យល់​ជាយ​ថា​ហេតុ​ ក្រសួងបរិស្ថាន បានណែនាំដល់អាជ្ញាធរមូលដ្នាន ត្រូវចូលរួម​ទប់ស្កាត់​ការ​បំពុល​ខ្យល់​តាមរយៈ​វិធានការ៤ចំនុចរួមមាន៖

ទី១.ត្រូវចាត់វិធានការ​ទប់ស្កាត់ភ្លើងឆេះព្រៃ និងកាដុតសំរាម សំណង់រឹងនៅតាមទីចំហ ការ​ឆេះ​នៅ​តាម​ទីលានចាក់សំរាម។ ទី២.ត្រូវចាត់វិធានការទប់ស្កាត់ការហុយធូលីពីការដ្ឋានសំណង់ និង​ការដ្ឋានកែលម្អហេដ្ឋារចនាសម្ព័ន្ធ និងធូលីហុយនៅតាមដងផ្លូវ។ ទី៣.សម្អាតអនាម័យនៅតាមដងផ្លូវ និងទីសាធារណៈ។ និងទី៤.អប់រំប្រជាពលរដ្ឋកុំឱ្យដុតសំរាម សំណល់​រឹង ការដុតស្មៅ គង់ជញ្រ្ជាំង និងសំណល់ក  សិកម្មផ្សេងៗទៀត៕ អត្ថបទ៖ ទូច សោភ័ណ