រដ្ឋមន្ត្រីការពារជាតិហ្វីលីពីន នៅថ្ងៃចន្ទ ទី៥ ខែកុម្ភៈនេះ បានប្តេជ្ញាថានឹងអនុវត្តយ៉ាងតឹងរ៉ឹង នូវអធិបតេយ្យភាពរបស់ប្រទេស ដោយចូលរួមជាមួយមន្ត្រីសន្តិសុខ ដែលសន្យាការពារប្រទេស បន្ទាប់ពីការគម្រាមកំហែងពីការធ្វើអបគមន៍ ដែលបង្កើតឡើងដោយអតីតប្រធានាធិបតី លោក រ៉ូទ្រីហ្គោ ឌូទឺតេ(Rodrigo Duterte)។ លោក Duterte កាលពីថ្ងៃទី ៣០ ខែមករា បានអំពាវនាវឱ្យមានឯករាជ្យភាពនៅកោះ មីនដាណាវ(Mindanao) ជាស្រុកកំណើតរបស់លោក នៅភាគខាងត្បូងប្រទេសហ្វីលីពីន ខណៈសម្ព័ន្ធភាពរបស់លោកជាមួយប្រធានាធិបតី លោក ហ្វឺឌីណង់ ម៉ាកូស ជេ អ(Ferdinand Marcos Jr) បានបែកបាក់កាលពីសប្តាហ៍មុន ជុំវិញការខ្វែងគំនិតគ្នាលើកិច្ចប្រឹងប្រែងធ្វើវិសោធនកម្មរដ្ឋធម្មនុញ្ញ។

រដ្ឋមន្ត្រីក្រសួងការពារជាតិ លោក ហ្គីលប៊ឺតូ តេអូដូរ៉ូ (Gilberto Teodoro) បាននិយាយនៅក្នុងសេចក្តីថ្លែងការណ៍ថា «កាតព្វកិច្ចរបស់ក្រសួងការពារជាតិ គឺធានាឲ្យបាននូវអធិបតេយ្យភាព និងបូរណភាពទឹកដីជាតិ របស់រដ្ឋ ដូចមានចែងក្នុងរដ្ឋធម្មនុញ្ញ»។ លោកបាននិយាយថា «យើងនឹងអនុវត្តកាតព្វកិច្ចនេះយ៉ាងតឹងរ៉ឹង មិនថាខាងក្រៅ ឬផ្ទៃក្នុងនោះទេ»។

សុន្ទរកថារបស់លោក Teodoro បានគាំទ្រសេចក្តីថ្លែងការណ៍ស្រដៀងគ្នា ធ្វើឡើងដោយទីប្រឹក្សាសន្តិសុខជាតិ ដែលកាលពីថ្ងៃអាទិត្យ បាននិយាយថា រដ្ឋាភិបាលនឹងមិនស្ទាក់ស្ទើរក្នុងការប្រើប្រាស់សិទ្ធិអំណាច និងកងកម្លាំងរបស់ខ្លួន ដើម្បីបង្ក្រាប និងបញ្ឈប់ការប៉ុនប៉ងណាមួយដើម្បីផ្តាច់ខ្លួនជាសាធារណៈ។ លោក Duterte បានបង្កើតប្រវត្តិសាស្ត្រ ដោយក្លាយជាប្រធានាធិបតីហ្វីលីពីនដំបូងគេ ដែលបានសាទរពីកោះ Mindanao សម្បូរទៅដោយធនធាន ត្រូវបានញាំញីដោយអំពើហិង្សា និងជម្លោះអស់ជាច្រើនទសវត្សរ៍ ខណៈរដ្ឋាភិបាល បានប្រយុទ្ធជាមួយក្រុមបះបោរ និងក្រុមជ្រុលនិយម។ ភាពចលាចល នេះបានបង្អាក់ទឹកចិត្តដល់ការវិនិយោគ និងបណ្តាលឲ្យភូមិជាច្រើនស្ថិតក្នុងភាពក្រីក្រ។