ភ្នំពេញ៖ សាកលវិទ្យាល័យ ខេមតិច កាលពីថ្ងៃទី៥ ខែកុម្ភៈ ឆ្នាំ២០២៤នេះ បានប្រារព្ធពិធីបើកបវេសនកាលឆ្នាំសិក្សា ២០២៣-២០២៤ ក្រោមអធិបតីភាពរបស់ ឯកឧត្តមសាស្ត្រាចារ្យបណ្ឌិត ឆែម គាតរិទ្ធី អនុប្រធានអចិន្ត្រៃយ៍ក្រុមប្រឹក្សាភិបាល នៃសាកលវិទ្យាល័យ និងមានការចូលរួមពីសិស្សនិស្សិត និងអាណាព្យាបាលជាច្រើននាក់។

សាកលវិទ្យាល័យខេមតិច បាននឹងកំពុងបំពេញសកម្មភាពរបស់ខ្លួនឱ្យស្របទៅតាមគោលបំណង និងទិសដៅជាគ្រឹះស្ថានឧត្តមសិក្សាដែលបណ្តុះបណ្តាលនិស្សិតលើមុខជំនាញដែលគាំទ្រ ដល់ការអភិវឌ្ឍឧស្សាហកម្ម៤.០ និងបរិវត្តកម្មឌីជីថល ដែលផ្តោតសំខាន់លើសហគ្រិនភាព ការស្រាវជ្រាវ នវានុវត្តន៍ ដើម្បីរួមចំណែកក្នុងការអភិវឌ្ឍទាំងវិស័យរដ្ឋ និងឯកជន។ ក្នុងបរិបទនេះ ខេមតិច បានចុះអនុស្សរណៈយោគយល់ជាមួយស្ថាប័នរដ្ឋ និងក្រុមហ៊ុនឯកជនធំៗ ព្រមទាំងសាកលវិទ្យាល័យទាំងក្នុងស្រុក និងក្រៅស្រុក ដើម្បីជំរុញឱ្យមានការផ្លាស់ប្តូរនិស្សិត ចែករំលែកបទពិសោធន៍ក្នុងគោលដៅពង្រឹង និងលើកកម្ពស់គុណភាពអប់រំក្នុងកម្រិតមួយដែលអាចប្រកួតប្រជែងជាមួយប្រទេសផ្សេងទៀតបាន ហើយសញ្ញាបត្រដែលចេញដោយខេមតិច នឹងត្រូវបានទទួលស្គាល់ជាលក្ខណៈសាកល។ 

នៅក្នុងពិធីបើកបវេសនកាលនេះ បណ្ឌិត ឃៀង សុធី សាកលវិទ្យាធិការនៃសាកលវិទ្យាល័យខេមតិច បានមានប្រសាសន៍ថា គោលបំណងចម្បងនៃកម្មវិធីបើកបវេសនកាលនេះគឺ ១)ស្វាគមន៍និស្សិតសម្រាប់ឆ្នាំសិក្សាថ្មី ២)ពង្រឹងទំនាក់ទំនងរវាងនិស្សិត សាស្រ្តាចារ្យ បុគ្គលិក ដៃគូឧស្សាកម្ម និងអាណាព្យាបាលនិស្សិត ៣)ប្រគល់បណ្ណសរសើរជូននិស្សិតឆ្នើម។ 

ជាមួយនេះ លោកបណ្ឌិត បានសម្តែងនូវការស្វាគមន៍យ៉ាងកក់ក្តៅ និងថ្លែងអំណរគុណ ចំពោះអ្នកចូលរួមទាំងអស់។ លោកបានបញ្ជាក់ថា ការចូលរួមនេះ គឺជាការឆ្លុះបញ្ចាំងពីគាំទ្រ និងឆន្ទៈរួមដំណើរដ៏មុតមាំដែលមិនអាចខ្វះបាន ជាមួយសាកលវិទ្យាល័យខេមតិច ក្នុងទិសដៅលើកកម្ពស់ការអប់រំឧត្តមសិក្សាប្រកបដោយគុណភាព។ លោកបានសង្កត់ធ្ងន់ថា «ការផ្តល់ការអប់រំដែលមានគុណភាព គឺជាកាតព្វកិច្ចនៃយើងទាំងអស់គ្នា»។

គួរបញ្ជាក់ផងដែរថា ខេមតិច គឺជាសាកលវិទ្យាល័យថ្មី ដែលមានមហិច្ឆតា «ប្រែក្លាយជាគ្រឹះស្ថានឧត្តមសិក្សាឈានមុខគេនៅកម្ពុជា ដែលផ្តល់ការអប់រំផ្តោតលើមុខជំនាញវិទ្យាសាស្ត្រ និងបច្ចេកវិទ្យា ឬស្ទែម ប្រកបដោយឧត្តមភាព។ បច្ចុប្បន្ន សាកលវិទ្យាល័យខេមតិច ត្រូវបានទទួលស្គាល់ និងគាំទ្រលើគុណភាពនៃការបណ្តុះបណ្តាលពីសំណាក់រាជរដ្ឋាភិបាល ក្រុមហ៊ុនឯកជន និងសាធារណជនទូទៅយ៉ាងទូលំទូលាយ។ សាកលវិទ្យាល័យខមេតិច បានខិតខំពង្រឹកកិច្ចសហប្រតិបត្តិការ និងភាពដៃគូជាមួយសាកលវិទ្យាល័យ និងក្រុមហ៊ុននានាទាំងនៅក្នុងប្រទេស តំបន់ និងពិភពលោក។ តាមរយៈកិច្ចសហប្រតិបត្តិការនានា និស្សិតនៃសាកលវិទ្យាល័យនេះ បានទទួលឱកាសផ្លាស់ប្តូរបទពិសោធន៍សិក្សា ការប្រកួតប្រជែង និងការហាត់ការងារនៅតាមបណ្តាក្រុមហ៊ុន និងសាកលវិទ្យាល័យជាដៃគូនៅក្នុងប្រទេស ដូចជា Canadia Group, OCIC Group, ISI Group ជាដើម និងនៅក្រៅប្រទេស រួមមាន ប្រទេសចិន ថៃ ម៉ាឡេស៊ី និងជាឥណ្ឌូនេស៊ី ជាដើម៕