មន្ត្រីជាន់ខ្ពស់ នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៧ ខែកុម្ភៈ ឆ្នាំ២០២៤នេះ បានជំរុញឱ្យសហជីពនៅកម្ពុជាទាំងអស់ ចូលរួមជាមួយរាជរដ្ឋាភិបាលក្នុងការជំរុញកម្មករឱ្យសិក្សាជំនាញបច្ចេកទេស ដើម្បីបង្កើនផលិតភាពការងារ។
ថ្លែងក្នុងពិធីបើកសន្និបាតបូកសរុបការងារឆ្នាំ២០២៣ និងទិសដៅការងារឆ្នាំ២០២៤ ឯកឧត្តម ហាំង តុលា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ប្រសិនបើសហជីពនៅកម្ពុជាចូលរួមធ្វើចលនាក្នុងការជំរុញកម្មករកម្មការិនីនៅតាមរោងចក្រសហគ្រាសឱ្យចូលវគ្គបណ្តុះបណ្តាលនឹងរួមចំណែកយ៉ាងខ្លាំង ដើម្បីបង្កើនផលិតភាពការងាររបស់កម្មករនៅកម្ពុជាដែលជាចំណុចប្រកួតប្រជែងក្នុងការទាក់ទាញវិនិយោគិនបរទេស។
បើតាមឯកឧត្តមអគ្គនាយក ក្រសួងការងារក្នុងអាណត្តិទី៧នេះ មានយុទ្ធសាស្ត្រជាអាទិភាពក្នុងការពង្រឹង និងបង្កើតជំនាញថ្មីដល់កម្មករកម្មការិនី និងប្រជាពលរដ្ឋ ហើយជាពិសេសក្រុមយុវជនគោលដៅមកពីគ្រួសារក្រីក្រ និងងាយរងហានិភ័យដែលជាកម្លាំងសេដ្ឋកិច្ចស្នូលសម្រាប់កម្ពុជា។
សូមបញ្ជាក់ថា កាលពីថ្ងៃទី១៥ ខែមករា ឆ្នាំ២០២៤កន្លងទៅ ក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គបណ្តុះបណ្តាលជំនាញបច្ចេកទេសដល់យុវជនមកពីគ្រួសារក្រីក្រជំនាន់ទី១ ដែលមានពលរដ្ឋប្រមាណ១,៥ម៉ឺននាក់ បាននិងកំពុងទទួលការបណ្តុះបណ្តាលដែលមាន៥០០ថ្នាក់នៅទូទាំងប្រទេស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
