សភាប្រទេសស្លូវ៉ាគី បានអនុម័តកំណែទម្រង់លុបចោលសាខាអយ្យការពិសេស ដែលដោះស្រាយលើឧក្រិដ្ឋកម្មកម្រិតខ្ពស់ និងបន្ថយទណ្ឌកម្មសម្រាប់ឧក្រិដ្ឋកម្មហិរញ្ញវត្ថុ ក្នុងនីតិវិធីដ៏លឿនមួយកាលពីថ្ងៃព្រហស្បតិ៍ (០៨ កុម្ភៈ) ស្របពេលមានការតវ៉ាជាសាធារណៈ និងការព្រួយបារម្ភពីគណៈកម្មការអឺរ៉ុប។

រដ្ឋាភិបាលរបស់លោកនាយករដ្ឋមន្រ្តី រ៉ូប៊ឺត ហ្វីខូ (Robert Fico) ដែលបានឡើងកាន់អំណាចកាលពីខែតុលា ឆ្នាំមុនជាលើកទីបួនបន្ទាប់ពីមានការប្រឆាំងតវ៉ា បានអះអាងថាការផ្លាស់ប្តូរនេះគឺចាំបាច់ដើម្បីបញ្ចប់នូវអ្វីដែលវាហៅថាការងារលើសបន្ទុកនៅការិយាល័យរដ្ឋអាជ្ញាពិសេស និងការលំអៀងប្រឆាំងនឹងគណបក្ស SMER-SSD ដែលកំពុងកាន់អំណាចបច្ចុប្បន្ន។

រដ្ឋាភិបាលបាននិយាយថាការផ្លាស់ប្តូរនេះបានធ្វើទំនើបកម្មក្រមព្រហ្មទណ្ឌដោយការកាត់បន្ថយទោសជាប់ពន្ធនាគាររយៈពេលវែង និងរើសយកវិធានការដាក់ទោសផ្សេងជំនួសវិញ។ ប្រធានាធិបតីស្លូវ៉ាគី លោកស្រី ហ្ស៊ូហ្សាណា ឆាពូតូវ៉ា (Zuzana Caputova) ភ្លាមៗបានផ្តល់សញ្ញាថាលោកស្រីនឹងព្យាយាមបញ្ឈប់លទ្ធភាពនៃការផ្លាស់ប្តូរនេះ តាមរយៈការវេតូ ឬការប្រជែងនៅក្នុងតុលាការ។

គណបក្សប្រឆាំង និងជនជាតិស្លូវ៉ាគីរាប់ម៉ឺននាក់ ដែលបានតវ៉ានៅឯការប្រមូលផ្តុំគ្នាទូទាំងប្រទេសក្នុងប៉ុន្មានសប្តាហ៍កន្លងមកនេះ បាននិយាយថា ការផ្លាស់ប្តូរនេះនឹងការពារសម្ព័ន្ធមិត្តផ្នែកនយោបាយ និងអាជីវកម្មរបស់នាយករដ្ឋមន្រ្តី ហ្វីខូ ពីការស៊ើបអង្កេត៕