ពលរដ្ឋជាប់សែស្រឡាយចិនរស់នៅរាជធានីភ្នំពេញជាច្រើន នៅថ្ងៃទី៩ ខែកុម្ភៈនេះ បាន​នាំគ្នា​ទិញជ្រូកខ្វៃ ទាខ្វៃ និងរណ្តាប់សែនផ្សេងៗ សម្រាប់សែនចូលឆ្នាំចិននៅថ្ងៃនេះ។

ពលរដ្ឋជាប់សែស្រឡាយចិន ដែលបានមកទិញរណ្ដាប់សែននៅផ្សារអូរឫស្សី បានប្រាប់ BTV ឱ្យ​ដឹង​ថា ពួកគេបាន ទិញ ជ្រូកខ្វៃ និងទាខ្វៃនេះ គឺដើម្បីយកទៅសែនទេវតាចូលឆ្នាំចិន និង​សែន​ដល់​សាច់​ញាតិ​ដែលបានចែកឋានទៅ។ ពលរដ្ឋអះអាង​ថា​ជាទំ​នៀម​ទម្លាប់​ពីដូន​តា​មក​ឱ្យ​តែ​ដល់​ពិធិ​បុណ្យចូលឆ្នាំចិន គឺតែងតែរៀបចំរណ្ដាប់សែនបែបនេះដើម្បីសូមសេចក្តីសុខ សេចក្តីចម្រើន និង​រកស៊ីកាក់កប់។

អាជីវករ បានឱ្យដឹងដែរថា នៅថ្ងៃសែនចូលឆ្នាំចិននេះ ការលក់ជ្រូកខ្វៃ និងទាខ្វៃ គឺលក់​ដាច់​ខ្លាំង​ប្រហាក់​ហែល​ទៅនឹងឆ្នាំមុន។ ចំណែកតម្លៃវិញក៏មិនឡើងថ្លៃផងដែរ។ ក្រុមអាជីវករ បានបង្ហាញ​ក្ដី​រីករាយ និងសប្បាយចិត្តនៅពេលដែលលក់ដាច់ច្រើនបែបនេះ។

សូមជម្រាបថា ឆ្នាំនេះពិធីបុណ្យចូលឆ្នាំចិន ប្រព្រឹត្តិទៅក្នុងរយៈពេល៣ថ្ងៃ ចាប់​ពីថ្ងៃ​ទី​១០​ដល់​ថ្ងៃ​ទី​១២ ខែកុម្ភៈ ឆ្នាំ២០២៤។ នៅមុនមួយថ្ងៃនៃពិធីបុណ្យចូលឆ្នាំចិន អ្នកជាប់សែស្រឡាយចិន តែង​តែ​រៀបចំសែនជូនទេវតា និងសាច់ញាតិដែលបានចែកឋានទៅ។ ជាទម្លាប់ក្នុង​ពិធី​បុណ្យ​ចូល​ឆ្នាំ​ចិន អ្នកជាប់សែស្រឡាយចិន និងប្រជាជនចិន តែងតែតុបតែងគ្រឿងលម្អស្អាត ជាពិ​សេស​ពណ៌​ក្រហម​នៅគេហដ្ឋានរបស់ពួកគេ ក្នុងបំណងឱ្យមានសំណាងល្អ សុភមង្គល ទ្រព្យសម្បត្តិ និង​អាយុវែង។ ក្រៅពីនេះ ក៏មានការចែកអាំងប៉ាវនាំសំណាងដល់សាច់ញាតិរបស់ពួកគេផងដែរ៕ អត្ថបទ៖ទូច សោភ័ណ