សារព័ត៌មាន CNN បានរាយការណ៍កាលពីថ្ងៃទី១១ ខែកុម្ភៈដោយដកស្រង់ប្រភពជាច្រើនថា កងទ័ពរុស្ស៊ី បានជ្រើសរើសជនជាតិនេប៉ាល់ចំនួន ១៥.០០០នាក់ ដើម្បីប្រយុទ្ធប្រឆាំងនឹងអ៊ុយក្រែន។

ខណៈដែលជនរងគ្រោះរុស្ស៊ីនៅលើសមរភូមិ កើនឡើង រដ្ឋាភិបាលនៅទីក្រុងមូស្គូ បានប្រកាសជ្រើសរើសជនបរទេសចូលក្នុងជួរកងទ័ពរបស់ខ្លួនសម្រាប់ប្រាក់បៀវត្សរ៍ចំនួន ២.000 ដុល្លារ និងទទួលបានសញ្ជាតិរុស្ស៊ីយ៉ាងឆាប់រហ័ស។

ជាមួយគ្នានេះ រដ្ឋាភិបាលនេប៉ាល់ អះអាងថា ពលរដ្ឋរបស់ខ្លួនប្រហែល ២០០នាក់ប៉ុណ្ណោះ កំពុងប្រយុទ្ធនៅអ៊ុយក្រែនខាងភាគីរុស្ស៊ី ដោយយ៉ាងហោចណាស់ ១៣នាក់ ត្រូវបានសម្លាប់ ក្នុងពេលកំពុងប្រតិបត្តិការ និង ៤នាក់ត្រូវបានចាប់ខ្លួនជាអ្នកទោសសង្គ្រាម។

សមាជិកសភានេប៉ាល់បក្សប្រឆាំង និងជាអតីតរដ្ឋមន្ត្រីការបរទេស លោក ប៊ីម៉ាឡា រ៉ៃប៉ូដយ៉ាល់ (Bimala Rai Paudyal) បាននិយាយថា ប្រជាជននេប៉ាល់ចន្លោះពី ១៤.០០០ ទៅ ១៥.០០០ នាក់ កំពុងប្រយុទ្ធគ្នាក្នុងប្រទេសអ៊ុយក្រែន ដោយដកស្រង់សក្ខីកម្មពីក្រុមបុរសដែលត្រឡប់មកពីខ្សែត្រៀមជួរមុខ។

សារព័ត៌មាន CNN បានកំណត់ទីតាំងភូមិសាស្ត្រមជ្ឈមណ្ឌលបណ្តុះបណ្តាលចំនួនពីរ ក្នុងប្រទេសរុស្ស៊ី ដែលជនជាតិនេប៉ាល់ និងជនបរទេសផ្សេងទៀត កំពុងហ្វឹកហាត់ មុនពេលត្រូវបានដាក់ពង្រាយទៅកាន់ខ្សែត្រៀមជួរមុខក្នុងប្រទេសអ៊ុយក្រែន។

ប្រទេសនេប៉ាល់ បានជំរុញឲ្យរដ្ឋាភិបាលរុស្ស៊ីបញ្ឈប់ការជ្រើសរើសពលរដ្ឋនេប៉ាល់ចូលក្នុងជួរកងទ័ពរបស់ខ្លួន ក្នុងខែធ្នូ បន្ទាប់ពីជនជាតិរបស់ខ្លួនយ៉ាងតិច៦នាក់ ត្រូវបានបញ្ជាក់ថា ត្រូវបានសម្លាប់។ បន្ទាប់មក អាជ្ញាធរ បានរកឃើញក្រុមរត់ពន្ធក្នុងស្រុក ដែលជ្រើសរើសយុវជនជាអ្នកប្រយុទ្ធបរទេសសម្រាប់យោធា   រុស្ស៊ី។