ប្រទេសហូឡង់ត្រូវបញ្ឈប់បញ្ជូនគ្រឿងបន្លាស់ សម្រាប់យន្តហោះចម្បាំង F-35 ដែលអ៊ីស្រាអែលប្រើប្រាស់ នៅតំបន់ហ្កាហ្សាស្ទ្រីប បន្ទាប់ពីតុលាការរបស់ប្រទេសនេះ នាថ្ងៃចន្ទ (១២ កុម្ភៈ) នេះ បានតម្កល់បណ្ដឹងឧទ្ធរណ៍របស់អង្គការសិទ្ធិមនុស្ស។

ក្រុមអង្គការទាំងនោះបានជំទាស់តវ៉ាថា ការផ្គត់ផ្គង់គ្រឿងបន្លាស់បានរួមចំណែកដល់ការចោទប្រកាន់ ដែលថា អ៊ីស្រាអែលបានរំលោភច្បាប់អន្តរជាតិ ក្នុងសង្រ្គាមជាមួយក្រុមហាម៉ាស។

សេចក្តីសម្រេចបានបញ្ជាក់ថា៖ «តុលាការបញ្ជាឲ្យរដ្ឋបញ្ឈប់ការនាំចេញជាក់ស្ដែងទាំងអស់ និងការដឹកជញ្ជូនគ្រឿងបន្លាស់យន្តហោះចម្បាំង F-35 ជាមួយនឹងគោលដៅចុងក្រោយទៅកាន់អ៊ីស្រាអែល ក្នុងរង្វង់រយៈពេល ៧ថ្ងៃ បន្ទាប់ពីការផ្តល់នូវសាលកម្រនេះ»។

សូមបញ្ជាក់ថា គ្រឿងបន្លាស់យន្តហោះចម្បាំង F-35 ដែលគ្រប់គ្រងដោយសហរដ្ឋអាមេរិក ត្រូវបានរក្សាទុកនៅឃ្លាំងមួយ ក្នុងប្រទេសហូឡង់ ហើយបន្ទាប់មកបានដឹកជញ្ជូនទៅកាន់បណ្ដាប្រទេសដៃគូជាច្រើន ក្នុងនោះរួមទាំងអ៊ីស្រាអែលផងដែរ តាមរយៈកិច្ចព្រមព្រៀងនាំចេញដែលមានស្រាប់។

ក្រុមសិទ្ធិមនុស្សបានជំទាស់តវ៉ាថា៖ «នៅក្នុងការធ្វើដូច្នេះ ហូឡង់កំពុងរួមចំណែកក្នុងការរំលោភច្បាប់មនុស្សធម៌យ៉ាងធ្ងន់ធ្ងនៃសង្គ្រាម នៅតំបន់ហ្កាហ្សា»។

កាលពីខែធ្នូ តុលាការតំបន់នៅទីក្រុងឡាអេ បាននិយាយថា ការផ្គត់ផ្គង់គ្រឿងបន្លាស់ គឺជាការសម្រេចផ្នែកនយោបាយដែលចៅក្រមមិនគួរជ្រៀតជ្រែកនោះឡើយ។

យ៉ាងណាក្ដី អាជ្ញាធរហូឡង់បានប្រាប់ថា នៅមិនទាន់ច្បាស់លាស់នោះទេថា តើពួកគេមានអំណាច ក្នុងការអន្តរាគមន៍ដល់ការចែកចាយ ដែលជាផ្នែកនៃប្រតិបត្តិការគ្រប់គ្រងដោយសហរដ្ឋអាមេរិកដែលផ្គត់ផ្គង់គ្រឿងបន្លាស់ដល់ដៃគូពាណិជ្ជកម្មរបស់យន្តហោះចម្បាំង F-35 ទាំងអស់ដែរ ឬយ៉ាងណា៕