ភ្នំពេញ៖ លោកស្រី Eda Kraja នាយកប្រចាំប្រទេសកម្ពុជា និងឡាវ នៃ​ការិយាល័យ​អង្គការ​សហ​ប្រជាជាតិ សម្រាប់សេវាកម្មគម្រោង (UNOPS) សន្យាបន្តនូវកិច្ចសហការ ជាមួយក្រសួង​រៀបចំ​ដែនដី នគរូបនីយកម្ម និងសំណង់ ក្នុងការអនុវត្តគម្រោងអាទិភាពនានារបស់ក្រសួង ប្រកប​ដោយ​ប្រសិទ្ធភាព។

ក្នុងនួបជាមួយឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយ​កម្ម និងសំណង់ កាលពីរសៀលថ្ងៃទី១២ ខែកុម្ភៈ ឆ្នាំ២០២៤ លោកស្រី Eda Kraja បាន​លើកឡើងថា UNOPS ជាដៃគូសហការរបស់រាជរដ្ឋាភិបាលកម្ពុជា តាមរយៈការ​ផ្ដល់​ជា​មូល​និធិ​សម្រាប់​អនុវត្តន៍គម្រោងនានា ហើយជំនួបនេះ ដើម្បីឈ្វេងយល់ និងសិក្សាឱ្យ​បាន​ស៊ី​ជម្រៅ​អំពី​គោល​នយោបាយអាទិភាពរបស់ក្រសួង ។

ឯកឧត្តម សាយ សំអាល់ មានប្រសាសន៍ថា បច្ចុប្បន្នក្រសួងមានកិច្ចការជាច្រើន ដែលទីភ្នាក់ងារ UNOPS អាចចូលរួមសហការក្នុងការអនុវត្តជាមួយគ្នា ក្នុងនោះមានការចុះបញ្ជីដីធ្លី ដែលគឺជា​គោល​នយោបាយអាទិភាពមួយរបស់ក្រសួង ដើម្បីផ្តល់សុវត្ថិភាព ក្នុងការកាន់កាប់ដីធ្លីស្របច្បាប់ និង​ធ្វើ​ឱ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង ។

ឯកឧត្តមបន្តថា ក្រសួងត្រូវការថវិកាប្រមាណ ១០០លានដុល្លារអាមេរិកទៀត ដើម្បី​បង្ហើយ​ការ​ចុះ​បញ្ជី​ដីធ្លីទូទាំងប្រទេស ហើយតាមផែនការគឺគ្រោងនឹងបញ្ចប់ក្នុងរយៈពេល ២ឆ្នាំខាងមុខ ខណៈ​នៅ​សល់ជាង ៥លានក្បាលដីទៀត ដែលត្រូវវាស់វែង និងចុះបញ្ជីជាប្រព័ន្ធ ។

ឯកឧត្តមឧបនាយករដ្ឋមន្ត្រី បានបញ្ជាក់ថា ការចុះបញ្ជីដីធ្លី ដើម្បីបន្តផ្តល់​បណ្ណ​កម្មសិទ្ធិ​ដល់​ប្រជាជន​ឱ្យបានលឿន បាននិងកំពុងផ្ដល់ផលប្រយោជន៍ជាច្រើន ដល់ប្រជាពលរដ្ឋ និងរាជ​រដ្ឋាភិបាល​កម្ពុជា ពិសេសគឺកាត់បន្ថយវិវាទដីធ្លី និងឈានទៅ​បង្កើត​បរិយាកាស​គ្មាន​វិវាទ​នៅ​ទូទាំង​ប្រទេស ព្រមទាំងជំរុញកំណើនសេដ្ឋកិច្ចជាតិបន្ថែមទៀត ហើយក្រសួង​នឹង​រៀបចំ​ក្រុម​ការងារ ដើម្បីគាំទ្រដល់កិច្ចសហការអនុវត្តការងារជាមួយ UNOPS ៕ អត្ថបទ បាន សុខរិទ្ធិ