​ប្រណាំង​កង់​៖ ​កីឡាករ​ប្រណាំង​កង់​អូស្ត្រាលី Ben O’Connor បាន​ប្រជែង​ឈ្នះ​ដំណាក់កាល​ទី ៩ នៃ​ការប្រកួត Grand Tour, Tour de France តែ​អ្នកការពារ​តំណែង​ជើងឯក Tadej Pogacar​ នៅតែ​បន្ត​នាំមុខ​រួម​ដដែល​។

​​ដំណាក់កាល​ទី៩ ដែលមាន​ចម្ងាយ​ផ្លូវ​ ១១៤៤.៩​គីឡូម៉ែត្រប្រណាំង​លើ​ស្ថានភាព​ផ្លូវ​ភ្នំ​ កីឡាករ Ben O’Connor របស់ ក្រុម​ប្រណាំង AG2R Citroen បានមក​ដល់ទី​ព្រ័ត្រ​មុនគេ​ប្រើពេល ៤ម៉ោង ២៦នាទី ៤៣វិនាទី​។ ​​លេខ២ ក្នុងដំណាក់កាល​បាន​ទៅ​កីឡាករ​អ៊ីតាលី Mattia Cattaneo ​របស់​ក្រុម Quick-Step យឺត​ជាង ៥នាទី ៧វិនាទី និង​លេខ៣ ក៏​ជា​កីឡាករ​អ៊ីតាលី​ដែរ​គឺ Sonny Colbrelli​ របស់​ក្រុម Bahrain-Victorious យឺត​ជាង ៥នាទី ៣៤វិនាទី​។

ដោយ​ឡែក​ក្រោយ ៩ដំណាក់កាល​នេះ​កីឡាករ​ស្លូ​វេ​នី Tadej Pogacar​ របស់​ក្រុម UAE Team Emirate នៅតែ​បន្ត​នាំមុខ​រួម​ដដែល​មាន​វេ​លា​សរុប ៣៤ម៉ោង ១១នាទី ១០វិនាទី​។ ​​អ្នក​លេខ២ គឺ​អ្នកឈ្នះ​ដំណាក់កាល​ទី៩ នេះ Ben O’Connor យឺត​ជាង ២នាទី ១០វិនាទី និង​លេខ៣ កីឡាករ​កូ​ឡុំ​ប៊ Rigoberto Uran​យឺត​ជាង ៥នាទី ១៨វិនាទី​។ ​​ថ្ងៃ​ចន្ទ​នេះ​មិនមាន​ការប្រកួត​ឡើយ​គឺជា​ថ្ងៃ​សម្រាក ខណៈ​ការប្រកួត​ដំណាក់កាល​ទី១០ ស្អែក​នេះ​មាន​ចម្ងាយ​ផ្លូវ ១៩០.៧​គីឡូម៉ែត្រប្រណាំង​លើ​ស្ថានភាព​ផ្លូវ​រាបស្មើ​៕

​អត្ថបទ​៖​នាង សុភា​វុ​ធ