សភាតំណាងរាស្រ្តសហរដ្ឋអាមេរិក ដែលគ្រប់គ្រងដោយគណបក្សសាធារណរដ្ឋ កាលពីថ្ងៃអង្គារ (១៣ កុម្ភៈ) បានឈ្នះការបោះឆ្នោតចោទប្រកាន់ដើម្បីទម្លាក់តំណែងប្រមុខមន្ត្រីព្រំដែនរបស់ប្រធានាធិបតីបក្សប្រជាធិបតេយ្យ លោក ចូ បៃដិន (Joe Biden) ដោយចោទប្រកាន់ប្រមុខមន្ត្រីរូបនោះពីគោលនយោបាយធូររលុងដែលលើកទឹកចិត្តឱ្យមានអន្តោប្រវេសន៍ខុសច្បាប់។

តាមរយៈការបោះឆ្នោតគាំទ្រ ២១៤ សំឡេងទល់នឹងការប្រឆាំង ២១៣ សំឡេង សភាបានអនុម័តមាត្រាចំនួនពីរនៃការចោទប្រកាន់ទម្លាក់តំណែង ដែលចោទរដ្ឋមន្ត្រីសន្តិសុខជាតិ លោក អាឡេហ្សានដ្រូ ម៉ាយ័រខាស (Alejandro Mayorkas) ថាមិនបានអនុវត្តច្បាប់អន្តោប្រវេសន៍របស់សហរដ្ឋអាមេរិក ដែលពួកសាធារណរដ្ឋ បានលើកឡើងថានាំឱ្យមានលំហូរជនអន្តោប្រវេសន៍ដ៏ច្រើនលើសលប់ឆ្លងកាត់ព្រំដែនអាមេរិក-ម៉ិកស៊ិក ហើយនិងបានធ្វើសេចក្តីថ្លែងការណ៍មិនពិតទៅកាន់សភា។

លោក ម៉ាយ័រខាស បាននិយាយថា លោកមិនទទួលខុសត្រូវចំពោះស្ថានភាពព្រំដែននោះទេ ដោយបានស្ដីបន្ទោសថាមកពីប្រព័ន្ធអន្តោប្រវេសន៍របស់សហរដ្ឋអាមេរិកដែលខូចខាត ដែលសភាមិនអាចជួសជុលបានជំនួសវិញ។

ជនអន្តោប្រវេសន៍ជាច្រើនបានឆ្លងព្រំដែនដោយខុសច្បាប់ពីប្រទេសម៉ិកស៊ិក ចាប់តាំងពីលោក បៃដិន ចូលកាន់តំណែងក្នុងឆ្នាំ២០២១មក ហើយអតីតប្រធានាធិបតី ដូណាល់ ត្រាំ (Donald Trump) បានធ្វើឱ្យបញ្ហានេះក្លាយជាការផ្តោតសំខាន់នៃយុទ្ធនាការបោះឆ្នោតរបស់ខ្លួនប្រឆាំងនឹងលោក បៃដិន៕