សមាគមអប់រំសីលធម៌អន្តរជំនាន់ បានជ្រើសរើសថ្ងៃទី ១៤ កុម្ភៈ ថ្ងៃទិវានៃក្ដីស្រឡាញ់ ដើម្បី​ចុះអប់រំសិស្សពីសីលធម៌ គុណធម៌ និងក្ដីស្រឡាញ់ដល់សិស្សានុសិស្ស ដើម្បី​ឱ្យ​សិស្ស​បាន​យល់​ច្បាស់ពី ទិវានៃក្ដីស្រឡាញ់ បញ្ចប់ការយល់ខុសពីអត្ថន័យនៃទិវានេះ និងអប់រំ​ឱ្យពួក​គេ​ក្លាយ​ជា​សិស្ស​គំរូ បុគ្គលគំរូសម្រាប់សង្គមជាតិ។

សមាគមអប់រំសីលធម៌អន្តរជំនាន់ ក្រោមការដឹកនាំដោយ លោក ឈួរ សុបញ្ញា នាយក​ប្រតិបត្តិ​សមាគម​អប់រំ​សីលធម៌អន្តរជំនាន់ និងមានការចូលរួមពីសមត្ថកិច្ច និងអាជ្ញាធរមូលដ្ឋាន បាន​រៀបចំ​កម្មវិធីអប់រំសីលធម៌ ក្រោមប្រធានបទ «បណ្ដុះគុណធម៌ បន្តក្ដីស្រឡាញ់»។ កម្មវិធី​នេះ​រៀប​ចំ​ឡើង​នៅទីតាំងសហគមន៍ដាអ៊ីល ដែលស្ថិតនៅខណ្ឌព្រែកព្នៅ រាជធានីភ្នំពេញ។

ជាការស្របគ្នានឹងទិវានៃក្ដីស្រលាញ់ លោក ឈួរ សុបញ្ញា ជានាយក​ប្រតិបត្តិ​សមាគម​អប់រំ​សីលធម៌​អន្តរជំនាន់ លើកឡើងថា ថ្ងៃទី ១៤ កុម្ភៈពុំមែនជា​ថ្ងៃ​ត្រូវលះបង់​ធ្វើ​អ្វី​ដែល​ខុស​ប្រាស​ចាក​ពី​ប្រពៃណីជាតិខ្មែរនោះទេ។ លោកប្រាប់ទៅសិស្សថា ថ្ងៃទី ១៤ កុម្ភៈ ជាថ្ងៃសិក្សា និង​បំពេញ​ការងារ​ជា​ធម្មតាប៉ុណ្ណោះ។ លោកបានណែនាំឱ្យសិស្សត្រូវរៀនពីសីលធម៌ គុណធម៌ ប្រឹង​ប្រែង​រៀន​សូត្រ ដើម្បីក្លាយជាកូនល្អ សិស្សគំរូ និងជាជនគំរូសម្រាប់សហគមន៍។ លោក​ក៏​បាន​ថ្លែង​អំណរគុណដល់សហគមន៍ ដាអ៊ីល ដែលបានបន្តជួយដល់​កុមារ​ងាយ​រង​គ្រោះ​អស់​រយៈពេល​ជា​ច្រើន​ឆ្នាំ​មកនេះផងដែរ។

ក្នុងឱកាសដដែលនេះ លោក ជាម សុជាតិ អគ្គលេខាធិការ នៃសមាគមអប់រំសីលធម៌អន្តរជំនាន់ លើក​ឡើងដែរថា ទិវានៃក្ដីស្រឡាញ់ ពុំមែនជាថ្ងៃបុណ្យសង្សារនោះទេ តែវាជាថ្ងៃដែល​ត្រូវ​សម្ដែង​ការ​ស្រឡាញ់ ទៅកាន់ និងការដឹងគុណចំពោះមនុស្សជុំវិញ អាចជា ឪពុកម្ដាយ គ្រូបង្រៀន សាច់ញាតិ បងប្អូន សហគមន៍ និងប្រទេសជាតិ។

លោក​បន្តថា សកម្មភាពដែលគួរប្រតិបត្តិសម្រាប់ថ្ងៃនៃទិវានៃក្ដីស្រឡាញ់នេះ អាចជា​ការ​បរិភោគ​អាហារ​ជុំ​គ្រួសារ ការទិញសៀវភៅជូនពួកគាត់ ការជូនពួកគាត់ដើរលេងកម្សាន្ត ជូនពួក​គាត់​ធ្វើ​បុណ្យ​កុសល្យរួមគ្នា ចែកទានដល់ង្នកក្រខ្សត់ កុមារកំព្រា ចាស់ជរាគ្មានទីពឹង ជួបជុំសាច់ញាតិ បងប្អូន ឬក៏ធ្វើសកម្មភាពចូលរួមសម្អាត និងថែរក្សាបរិស្ថាន ជាដើម៕ អត្ថបទ៖ គឹមហុក