​អាមេរិក៖ ក្រុមការងារ​វាយកម្ទេច​បាន​ដាក់​គ្រឿងផ្ទុះ​កាលពី​ល្ងាច​ថ្ងៃអាទិត្យ​ ដើម្បី​ផ្ដួល​រំលំ​ផ្នែក​ដែល​នៅ​សេសសល់​នៃ​អគារ​ខុន​ដូ​នៅ​ភាគ​ខាង​ត្បូង​រដ្ឋ Florida​ ដែល​ជា​ជំហាន​ដ៏​សំខាន់​ដើម្បី​បន្ត​ស្វែងរក​ជន​រងគ្រោះ ​ខណៈ​អ្នក​ជួយសង្គ្រោះ​អាច​ចូល​ទៅ​កាន់​តំបន់​ថ្មី​នៃ​គំនរ​បាក់បែក​។​

​ក្រុម​មន្ត្រី​បាន​និយាយ​ថា ​ផ្នែក​នៃ​អគារ​ខុន​ដូ​តំបន់​ Miami ដួល​រលំ​ដែល​មនុស្ស ២៤​នាក់​ត្រូវ​បាន​គេ​អះ​អាង​ថា​បាន​ស្លាប់ ​ត្រូវ​កម្ទេច​ចោល​កាលពី​យប់​ថ្ងៃអាទិត្យ​ ទី​៤ ខែ​កក្កដា​មុន​ការ​មក​ដល់​នៃ​ព្យុះ​ត្រូ​ពិ​ក​អេ​ល​សា​ (Tropical Storm Elsa)​។​ ៨០​ភាគរយ​នៃ​ការងារ​ខួង​បាន​បញ្ចប់ ​ហើយ​សំណង់​ដែល​នៅ​សេសសល់​បាន​ធ្លាក់​ចុះ​មក​កាលពី​រាត្រី​ថ្ងៃអាទិត្យ នេះ​បើ​យោង​តាម​លោក Raide Jadallah ជំនួយការ​ប្រធាន​អង្គភាព​ពន្លត់​អគ្គិភ័យ ដែល​បាន​ប្រាប់​សាច់ញាតិ​របស់​អ្នក​ដែល​បាន​បាត់​ខ្លួន​នៅ​ក្នុង​ការ​បាក់​រលំ​នោះ​។

​លោកបាន​កោតសរសើរ​ពី​ល្បឿន​នៃ​ការងារ​របស់​ក្រុមការងារ​វាយកម្ទេច និង​ទទួល​បានការ​សាទរពី​ក្រុម​គ្រួសារ​ ដែល​អន្ទះសា​ចង់​ឲ្យ​មានការ​ចាប់ផ្ដើម​ស្វែងរក​ជាថ្មី​ នៅ​ពេល​លោ​កថា ​អគារ​នោះ​អាច​បាន​ដួល​រលំ​ឆាប់​ជាង​ការ​រំពឹង​ទុក​។​ គ្មាន​អ្នក​ដែល​ត្រូវ​បាន​គេ​ជួយសង្គ្រោះ​នៅ​រស់​រាន​មាន​ជីវិត​ទេ ចាប់​តាំង​ពី​ប៉ុន្មាន​ម៉ោង​ដំបូង​បន្ទាប់ពី​ដួល​រលំ​កាលពី​ថ្ងៃ​ទី​២៤ ​ខែ​មិថុនា​។ អភិបាល​រដ្ឋ​ Miami លោកស្រី Daniella Levine Cava បាន​ប្រាប់​ក្រុម​អ្នកសារព័ត៌មាន​កាលពី​ថ្ងៃអាទិត្យ​ថា ​ដំណើរការ​វាយ​កម្ទេច​ចោល​នេះ​នឹង​ធ្វើ​ឡើង​នៅ​ចន្លោះ​ម៉ោង ១០​យប់​និង ​៣​ព្រឹក​ម៉ោង​នៅ​សហរដ្ឋអាមេរិក៕

អត្ថបទ៖ សុខមាន