មនុស្សរាប់សិបនាក់ នៅទីក្រុងហ្សឺណែវ បានកាន់ទុក្ខចំពោះការស្លាប់របស់មេដឹកនាំប្រឆាំងរុស្ស៊ី លោក អាឡិចសេ ណាវ៉ាលនី(Alexei Navalny) កាលពីថ្ងៃសុក្រ នៅខាងមុខអគាររបស់អង្គការសហប្រជាជាតិ ដោយកាន់ផ្កាពណ៌ស និងផ្ទាំងរូបភាពនិងបដា សរសេរថា «លោកពូទីន គឺជាឃាតករ»។ អាជ្ញាធរ បាននិយាយថា លោក Navalny ដែលជាគូប្រជែងក្នុងស្រុកដ៏គួរឱ្យខ្លាចបំផុតរបស់ប្រធានាធិបតីរុស្ស៊ី លោក Vladimir Putin បានសន្លប់ ហើយក៏បានស្លាប់កាលពីថ្ងៃសុក្រ។ អង្គការឃ្លាំមើលសិទ្ធិមនុស្ស និង នាយករងនៃផ្នែកនៅតំបន់អឺរ៉ុប និងអាស៊ីកណ្តាល លោក រ៉ាឆែល ដេនប៊ឺ (Rachel Denber) បាននិយាយថា អាជ្ញាធររុស្ស៊ី ត្រូវទទួលខុសត្រូវទាំងស្រុងចំពោះការស្លាប់របស់លោក Navalny ហើយសកម្មជនផ្សេងៗទៀតនៅក្នុងពន្ធនាគារ កំពុងស្ថិតក្នុងគ្រោះថ្នាក់ខ្លាំង។

លោក Navalny ធ្លាប់ជាមេដឹកនាំប្រឆាំងដ៏លេចធ្លោបំផុតចាប់តាំងពីការចេញមុខជាអន្តរជាតិ ក្នុងអំឡុងពេលបាតុកម្មតាមនៅដងផ្លូវក្នុងឆ្នាំ ២០១១ ហើយអ្នកគាំទ្រមួយចំនួន បានជឿថានៅទីបំផុត លោកនឹងធ្វើដំណើរដោយសេរី និងក្លាយជាមេដឹកនាំរុស្ស៊ី។ ការស្លាប់របស់លោក ប្រសិនបើត្រូវបានបញ្ជាក់ គឺវាបានទុកឱ្យក្រុមដែលប្រឆាំង លោក ពូទីន នៅខ្ចាត់ខ្ចាយ គ្មានក្បាលម៉ាស៊ីន។ ជាមួយគ្នានេះ ក្រុមបាតុកររាប់រយនាក់ បានមកប្រមូលផ្តុំគ្នាដោយសន្តិវិធីនៅខាងក្រៅស្ថានទូតរុស្ស៊ីក្នុងទីក្រុងប៊ែកឡាំងកាលពីយប់ថ្ងៃសុក្រ ដើម្បីរំលឹកដល់មេដឹកនាំប្រឆាំងរុស្ស៊ីលោក លោក Alexei Navalny ដោយស្រែកថា «លោកពូទីនគឺជាឃាតករ» និង «លោកពូទីន ត្រូវតែទៅកាន់ទីក្រុងឡាអេ» នៅក្នុងលាយឡំគ្នាជាភាសារុស្ស៊ី អាល្លឺម៉ង់ និងអង់គ្លេស។ 

ទន្ទឹមនឹងនេះ ក្រុមបាតុករប្រមាណ១០០នាក់ បានមកប្រមូលផ្តុំគ្នា នៅជិតស្ថាតទូតរុស្ស៊ី ក្នុងទីក្រុងរ៉ូម ប្រទេសអ៊ីតាលី ដើម្បីតវ៉ាការស្លាប់របស់លោក Alexei Navalny ជាអ្នករិះគន់វិមានក្រឹមឡាំង ដែលមានកាន់ស្លាកសញ្ញារិះគន់ប្រធានាធិបតីរុស្ស៊ី លោក Vladimir Putin ដែលមនុស្សជាច្រើនបានដាក់កំហុសចំពោះការស្លាប់របស់សកម្មជនរូបនេះ៕