អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិត គី សេរីវឌ្ឍន៍ គាំទ្រ​ការណែនាំ​របស់​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តី ដែលណែនាំក្រសួងការងារ និង​​បណ្តុះ​បណ្តាល​ជំនាញ​វិជ្ជាជីវៈបន្តពង្រឹងកម្មវិធីការបង្កើនជំនាញ(Upskilling) និងការផ្លាស់ប្តូរ​ជំនាញ​(Reskilling) ដល់កម្មករនិយោជិត ពីព្រោះជាយុទ្ធសាស្ត្របង្កើនផលិតភាពការងារ និង​ទាក់​ទាញ​វិនិយោគ​លើ​វិស័យឧស្សាហកម្មនៅកម្ពុជា។

អ្នកជំនាញសេដ្ឋកិច្ចរូបនេះថា៖«វាមានសារៈសំខាន់ណាស់ក្នុងការបង្កើនផលិតភាពការងារនៅក្នុង​វិ​ស័យឧស្សាហកម្មនៅកម្ពុជា ដោយ​សារ​តែ​គោល​ដៅ​របស់​រាជ​រដ្ឋាភិបាល អាណត្តិទី៧នេះ គឺ​បាន​ដាក់​គោលនយោបាយរុញច្រានវិស័យឧស្សាហកម្មនៅក្នុងស្រុក ក្នុងគោល​បំណង​បង្កើន​តម្លៃ​ប​ន្ថែម ដូច្នេះហើយមានតែការពង្រឹងកម្មវិធីការបង្កើនជំនាញ(Upskilling) និង​ការ​ផ្លាស់ប្តូរ​ជំនាញ​ដល់​កម្មករនិយោជិតទេដែលអាចឱ្យគោលនយោបាយនេះដើរទៅមុខបាន»។

លោកបន្ថែមថា ក្នុងយន្តការបណ្តុះបណ្តាលវិជ្ជាជីវៈនេះ ការពង្រឹង​កម្ម​វិធីការ​បង្កើន​ជំនាញ (Upskilling) និងការផ្លាស់ប្តូរជំនាញ(Reskilling) ដល់​កម្មករ​និយោជិត​គឺ​ជា​កិច្ចការ​មួយ​សំខាន់​ណាស់​សម្រាប់​លើកកម្ពស់សមត្ថភាពជំនាញទៅដល់កម្មករ​និយោជិត​ដែល​កំពុង​បម្រើ​ការងារ​នៅ​តាម​រោង​ចក្រ​សហគ្រាស បើទោះបីពួកគាត់មានជំនាញ និងគ្មានជំនាញក៏ដោយ។

លោកបានសង្កត់ធ្ងន់ថា ប្រសិន​បើ​កម្ពុជា​ជោគ​ជ័យ​លើ​ការ​ពង្រឹង​កម្ម​វិធី​ការ​បង្កើន​ជំនាញ​(Upskilling) និងការផ្លាស់ប្តូរជំនាញ(Reskilling) ដល់កម្មករនិយោជិតគោលដៅហើយ នោះ​កម្លាំងជំនាញនៅកម្ពុជានឹងមានសញ្ញាណល្អរុញច្រានវិស័យការងារនៅកម្ពុជាដើរទៅមុខ ជា​ពិសេស​នោះ​ទាក់ទាញភ្នែកអ្នកវិនិយោគទាំងក្រៅស្រុក និងនៅក្នុងស្រុក លើវិស័យ​ឧស្សាហកម្ម​ធំៗ​មក​កាន់​ប្រទេសកម្ពុជា ពីព្រោះពួកគេ​យល់​ថា​កម្ពុជា​មាន​ធន​ធាន​មនុស្ស​រួច​ជា​ស្រេច​ដែល​អាច​ឆ្លើយ​តប​ទៅនិងតម្រូវការការងាររបស់ក្រុមហ៊ុនពួកគេបាន។ 

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីបាន ណែនាំឱ្យក្រសួងការងារ និងបណ្តុះ​បណ្តាល​វិជ្ជាជីវៈត្រូវបន្តពង្រឹងកម្មវិធីការបង្កើនជំនាញ(Upskilling) និងការផ្លាស់​ប្តូរ​ជំនាញ​(Reskilling) ដល់កម្មករនិយោជិតដែលកំពុងបំពេញការងារគ្មានជំនាញ, មិនមាន​ជំនាញ​គ្រប់​គ្រាន់ ​ឬខុសជំនាញ, អ្នកបាត់បង់ការងារ, និងអ្នករងផលប៉ះពាល់ពីការប្រែប្រួលនៃបច្ចេកវិទ្យា និង​ពិភពការងារ ដើម្បីលើកកម្ពស់ផលិតភាពការងារ, ការជំរុញ​ការ​អនុវត្ត​កាតព្វ​កិច្ច​ហ្វឹក​ហ្វឺន​កូន​ជាង និងការផ្តល់ឱកាសចុះកម្មសិក្សា, ទទួលការបណ្តុះបណ្តាល និងបង្កើន​សមត្ថភាព​កម្មករ​និយោជិត នៅនឹងកន្លែងការងារ, ព្រមទាំងការអនុវត្តកម្មវិធីបណ្តុះបណ្តាល តាមថ្នាល​ឌីជីថល​នៅ​កន្លែង​ការងារ, កម្មវិធីបែបចម្រុះ ឬឆ្លាស់ ជាពិសេសការ​ផ្តល់​ឱកាស​ទទួល​បាន​ការ​សិក្សា​ពេញ​មួយ​ជីវិត, ការធ្វើតេស្តវាយតម្លៃសមត្ថភាពពីមុន និងសមត្ថភាពបច្ចុប្បន្ន, និងកា​រ​អនុវត្តការទទួល​ស្គាល់​​ជំនាញគ្នា​ទៅវិញទៅមក ក្នុងតំបន់អាស៊ានជាដើម៕