បណ្ដារដ្ឋមន្ត្រីការបរទេសនៃក្រុមប្រទេសទាំង ២០ (G20) បានបើកកិច្ចប្រជុំរយៈពេលពីរថ្ងៃនៅថ្ងៃពុធ (២១ កុម្ភៈ) នេះនៅក្នុងប្រទេសប្រេស៊ីល ជាមួយនឹងចក្ខុវិស័យមិនច្បាស់លាស់សម្រាប់វឌ្ឍនភាពលើរបៀបវារៈនៃជម្លោះ និងវិបត្តិ រាប់ចាប់ពីសង្រ្គាមហ្កាហ្សា និងអ៊ុយក្រែន រហូតដល់បញ្ហាអាកាសធាតុ ដែលជាការផ្ដោតសំខាន់ក្នុងកិច្ចប្រជុំ។

រដ្ឋមន្ត្រីការបរទេសអាមេរិកលោក អាន់តូនី ប្លីងខិន (Antony Blinken) និងរដ្ឋមន្ត្រីការបរទេសរុស្ស៊ី លោក សឺហ្កេ ឡាវរ៉ូវ (Sergei Lavrov) ត្រូវបានរំពឹងថានឹងស្ថិតនៅទីក្រុង រីអូ ដេ ហានៃរ៉ូ (Rio de Janeiro) សម្រាប់កិច្ចប្រជុំ G20 កម្រិតខ្ពស់លើកដំបូងក្នុងឆ្នាំនេះ ប៉ុន្តែនឹងមិនមានវត្តមានរដ្ឋមន្រ្តីការបរទេសចិន លោក វ៉ាង យី (Wang Yi) ចូលរួមនោះទេ។

រយៈពេលជាងបួនខែបន្ទាប់ពីសង្រ្គាមហ្កាហ្សា រវាងក្រុមហាម៉ាស និងអ៊ីស្រាអែលមក មានសញ្ញាតិចតួចណាស់នៃការរីកចម្រើនឆ្ពោះទៅរកសន្តិភាព។ ទស្សនវិស័យនេះមានការធ្លាក់ចុះស្រដៀងគ្នាទៅនឹងសង្គ្រាមរបស់រុស្ស៊ី នៅអ៊ុយក្រែន ដែលធ្វើឱ្យមានការខ្វែងគំនិតគ្នាក្នុងចំណោមសមាជិក G20។

ទោះបីជាមានការជំរុញពីបណ្តាប្រទេសលោកខាងលិច ឱ្យក្រុមនេះថ្កោលទោសការឈ្លានពានរបស់លោកប្រធានាធិបតី វ្ល៉ាឌីមៀ ពូទីន ក៏ដោយ កិច្ចប្រជុំកំពូលចុងក្រោយរបស់ក្រុម G20 ដែលធ្វើឡើងនៅទីក្រុងញូវដេលី ក្នុងខែកញ្ញា បានបញ្ចប់ដោយសេចក្តីថ្លែងការណ៍ដ៏ស្រពិចស្រពិល ដែលថ្កោលទោសការប្រើប្រាស់កម្លាំងយោធា ប៉ុន្តែមិនបានបញ្ចេញឈ្មោះឱ្យច្បាស់ថាជាប្រទេសរុស្ស៊ីនោះទេ៕