បន្ទាយមានជ័យ​ ៖​ នៅល្ងាចថ្ងៃទី២១​ ខែកុម្ភៈ​ ឆ្នាំ២០២៤​ ប្រតិភូអន្តរក្រសួង​ មាន​ក្រសួង​មន្ទីរ​ធន​ធាន​ទឹក​ និងឧត្តមនិយម​ និងក្រសួងសេដ្ឋកិច្ច​ បាន​អញ្ជើញ​ចុះពិនិត្យ​មើល​គម្រោង​នៃ​ការ​ស្តារ​ស្ទឹង​ ចាប់ពីចំណុចអូរកំបុត​ ស្ថិតនៅឃុំគោករមៀត​ ស្រុកថ្មពួក​ កាត់តាមស្រុកស្វាយចេក​ ចូល​មក​ក្រុង​សិរីសោភ័ណ ដែលជាផ្លូវទឹកយ៉ាងសំខាន់ក្នុងការបញ្ចៀសទឹកជំនន់​ ខណៈ​រយៈ​ពេល​ប៉ុន្មាន​ឆ្នាំ​​មក​​នេះ​ខេត្តបន្ទាយមានជ័យ​ បានទទួលរងនូវគ្រោះទឹកជំនន់ជារៀងរាល់ឆ្នាំ​ ដែល​ទឹកជំនន់​ធ្លាក់​​មក​​ពីប្រទេសថៃផង​ និងទឹកជំនន់ទឹកភ្លៀងផង​។

បើតាមការបញ្ជាក់ឱ្យដឹងពីលោក​ ហ៊ឹល​ រ៉ាយ៉ា​ អភិបាលរងខេត្ត​ ការស្ដារ​ស្ទឹង​នេះ​គឺ​ជា​សរសៃ​ឈាម​យ៉ាង​សំខាន់ក្នុងការបញ្ចៀសនូវទឹកជំនន់​ ដែលតែងតែកើតមានជារៀងរាល់ឆ្នាំ​ ដោយសារ​តែ​ការ​ប្រែប្រួ​ល​អាកាសធាតុ។ លោកថា​ ជាក់ស្តែងគម្រោងនៃការស្តារស្ទឹងនេះ​ វាពិតជាផ្តល់​អត្ថ​ប្រយោជន​ច្រើន សម្រាប់ប្រជាពលរដ្ឋទាំង៣ស្រុក​ មានស្រុកថ្មពួក​ ស្វាយចេក​ និងក្រុង​សិរីសោភ័ណ​​។ ទី១​-បញ្ចៀសនូវទឹកជំនន់​, ទី២​-អាចស្តុបទឹកទុក​សម្រាប់​បង​ប្អូន​ប្រជាព​លរ​ដ្ឋ​ប្រើប្រាស់​ ក៏ដូចជាបម្រើរក្នុងវិស័យកសិកម្ម។

សូមបញ្ជាក់ផងដែរថា​ គម្រោងស្ដារស្ទឹងចាប់ពីចំណុច អូរកំបុត​ ស្ថិតក្នុងឃុំគោករមៀត​ ស្រុកថ្មពួក​ កាត់​តាមស្រុកស្វាយចេក​ ទៅស្ទឹងសិរីសោភ័ណ​ ក្រុងសិរីសោភ័ណ​ មាន​ប្រវែង​ប្រមាណ​ជាង ៨០​គីឡូ​ម៉ែត្រ។​ ដោយជំហានដំបូង​ បានអនុវត្តគម្រោងស្ដារស្ទឹងស្វាយចេក​ ដែលមាន​ប្រវែង​ ១៦​គីឡូម៉ែត្រ​ ត្រូវបានស្ថាបនារួចរាល់ហើយ​។ ជំហានទី២​ នឹងចាប់ផ្តើមពីព្រំប្រទល់​នៃ​ស្រុក​ស្វាយ​ចេក​ ទៅក្រុងសិរីសោភ័ណ​ ឆ្ពោះទៅស្ពានទី២​ ចូលស្ទឹងសិរីសោភ័ណ៕​ អត្ថបទ​ រូបភាព​ រឿង​ ចន្ទ្រា