​បាល់ទាត់៖ ​ខ្សែប្រយុទ្ធ​ក្រុម​សេះបង្កង់ Juventus ទាំងពីរ​នាក់ Federico Chiesa និង Alvaro Morata​ រកបាន​ម្នាក់​មួយគ្រា​ប់ក្នុងជំនួប​វគ្គ​ពាក់កណ្តាល​ផ្តាច់ព្រ័ត្រ Euro ២០២០ រវាងអ៊ីតាលី និង​អេ​ស្ប៉ា​ញ​ តែ​អ្នក​ទាំងពីរ​មានជោគ​វាសនា​ផ្ទុយ​ពីគ្នា​។

​​ក្រុម​ជើងឯក​ពិភពលោក​ឆ្នាំ២០០៦ អ៊ីតាលី​ស៊ុត​នាំមុខ​មុន​ដោយ Federico Chiesa នៅ​នាទី​ទី៦០ មុន​ពេលដែល​មិត្ត​រួម​នៅ Juventus, Alvaro Morata​ ដែលជា​កីឡាករ​បម្រុង​ផ្លាស់ប្តូរ​ចូល​នោះ​ ក៏​ស៊ុត​តាម​ស្មើ​ឱ្យ​អេ​ស្ប៉ា​ញ​វិញ​នៅ​នាទី​ទី៨០​។ ​​ជំនួប​ដ៏​តានតឹង​ក៏​អូសបន្លាយ​ដល់​វគ្គ ១១ម៉ែត្រ​កាត់សេចក្តី​ដោយ​អ៊ីតាលី Manuel Locatelli និង​អេ​ស្ប៉ា​ញ Dani Olmo​ បើកឆាក​ស៊ុត​មិន​ចូល​ដូចគ្នា​។ ​​ក្រៅពីនោះ​អ៊ីតាលី​ស៊ុត​បានសំរេច​ទាំងអស់​ តែ​អេ​ស្ប៉ា​ញ Alvaro Morata​ ដែល​ស៊ុត​តាម​ស្មើ​នោះ​បែ​ជា​ស៊ុត​មិន​ចូល ធ្វើឱ្យ​អ៊ីតាលី​ឡើង​វគ្គ​ផ្តាច់ព្រ័ត្រ Euro ២០២០ ហើយ​អេ​ស្ប៉ា​ញ​ចាញ់​នៅ​វគ្គ​ពាក់កណ្តាល​ផ្តាច់ព្រ័ត្រ Euro នេះ​ជា​លើកដំបូង​ក្នុង​ប្រវត្តិសាស្ត្រ​។ ​​ក្រុម​​របស់លោក Roberto Mancini នៅពេលនេះ​បន្ត​ស្ថិតិ​មិនដែល​ចាញ់​របស់ខ្លួន​ក្នុង​ព្រឹត្តិការណ៍ Euro ២០២០ នេះហើយ​ក៏​ជា​ស្ថិតិ​មិន​ចាញ់​សោះ ២៩ប្រកួត​ជាប់​គ្នា​ផងដែរ​។

​​អ៊ីតាលី​ត្រូវ​អង្គុយ​រង់ចាំ​នៅ​វគ្គ​ផ្តាច់ព្រ័ត្រ​នៅ​កីឡដ្ឋាន Wembley​ នេះ​រង់ចាំ​ជួប​ជាមួយ​ក្រុម​ឈ្នះ​រវាង​អង់គ្លេស និង​ដា​ណឺ​ម៉ាក​ដែល​ជួបគ្នា​យប់​នេះ​នៅ Wembley ​ដូចគ្នា​។​ ​​នេះ​ជាការ​ឈានឡើង​វគ្គ​ផ្តាច់ព្រ័ត្រ​ជើងឯក​ទ្វីបអឺរ៉ុប​លើក​ទី៤ សំរាប់​អ៊ីតាលី និង​ធ្លាប់​ឈ្នះ​ជើងឯក​ម្តង​។ ​​ជំនួប​អ៊ីតាលី និង​អេ​ស្ប៉ា​ញ​ក្លាយជា​ជំនួប​ញឹកញាប់​បំផុត ១០លើក​ដែល​ក្រុម​ទាំងពីរ​ជួបគ្នា​ច្រើន​ជា​ង​ក្រុម​ណាៗ​ទាំងអស់​នៅ​អឺរ៉ុប​។​ ​​អ៊ីតាលី​គឺជា​ក្រុមទី​ពីរ​ដែលមាន​កីឡាករ ៥នាក់​ផ្សេងគ្នា​ស៊ុត​បញ្ចូល​ទី​បាន ២ រឺ​លើសពី ២គ្រាប់​ក្នុង​ព្រឹត្តិការណ៍ Euro​។​ ​​ចំណែក​កីឡាករ​អេ​ស្ប៉ា​ញ Pedri​ ក៏បាន​ក្លាយជា​កីឡាករ​អឺរ៉ុប​ដំបូង​ដែល​ជាប់ ១១នាក់​ដំបូង ៦ប្រកួត​ជាប់​គ្នា​នៅ​ការប្រកួត​ពានរង្វាន់​ធំៗ​ក្នុង​វ័យ ១៨ឆ្នាំ​រឺ​ក្រោម​នេះ​៕

​អត្ថបទ​៖​នាង សុភា​វុ​ធ