ភ្នំពេញ៖ សហជីព និងកម្មកររោងចក្រ បានសម្តែង​ការ​គាំទ្រចំពោះការ​ដាក់​ចេញ​បទ​បញ្ជា​ដ៏​ម៉ឺងម៉ាត់ ស្តីពីការប្រយុទ្ធប្រឆាំងគ្រឿងនៅតាមក្រសួង-ស្ថានប័ន របស់សម្តេចធិបតីហ៊ុន ម៉ាណែត នាយករដ្ឋមន្ត្រី នៃកម្ពុជា ដោយត្រូវបញ្ចប់មុខតំណែង និងបណ្តេញចេញ​ពី​ក្របខ័ណ្ឌ​ចំពោះ​មន្ត្រី​រូបណារកឃើញប្រើប្រាស់ និងពាក់ព័ន្ធគ្រឿងញៀនខុសច្បាប់។

ជួបសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី២២ ខែកុម្ភៈនេះ លោក គឹម ចាន់​សំណាង ប្រធានសហភាពសិទ្ធិកម្មករកម្ពុជា បានលើកឡើងថា លោក​ពិត​ជា​សប្បាយ​ចិត្ត​ចំពោះ​បទ​បញ្ជា​នេះ និងគាំទ្រយ៉ាង​ពេញ​ទំហឹង​ចំពោះ​ការ​ដាក់​ចេញ​វិធានការ​ម៉ឺងម៉ាត់​របស់​សម្តេច​នាយករដ្ឋ​មន្រ្តី ក្នុងការប្រយុទ្ធប្រឆាំង គ្រឿងញៀនខុសច្បាប់ នៅតាមក្រសួង ស្ថាប័ន និង រដ្ឋបាល ថ្នាក់ក្រោមជាតិ តាមរយៈការធ្វើតេស្តរកសារជាតិញៀនទៅលើមន្រ្តីរាជការគ្រប់ស្ថាប័ន និង​បណ្តេញមន្រ្តីចេញពីក្របខណ្ឌប្រសិនបើរកឃើញថាមានសារជាតិញៀន។

កម្មករ កម្មការនី រោងចក្រកាត់ដេរសម្លៀកបំពាក់ ក្នុងសួនឧស្សាហកម្មវឌ្ឍនៈ១ ស្ថិត​នៅ​សង្កាត់​ចោម​ចៅទី​១ ខណ្ឌពោធិ៍សែនជ័យ រាជធានីភ្នំពេញ បាននិយាយថា ការដាក់ចេញ​បទ​បញ្ជា​មួយ​នេះ​ ពិត​ជាល្អខ្លាំងណាស់ក្នុងការលុបបំបាត់បញ្ហាគ្រឿងញៀន ព្រោះបាន​ជួយ​ដល់​ក្មេងៗ​ជំនាន់​ក្រោយ ​ជួយដល់សង្គមជាតិ និងជួយឲ្យប្រទេសជាតិកាន់តែរីកចម្រើនទៅមុខបន្តទៀត ជា​មួយ​សុខ​សន្តិភាព​យ៉ាងពេញលេញ។

សម្តេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី២០ ខែកុម្ភៈ ឆ្នាំ២០២៤ បាន​ចេញ​បញ្ជា​តម្រូវ​ឱ្យ​គ្រប់​ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រួតពិនិត្យជា​ប្រចាំ​ចំពោះ​មន្រ្ដី​រាជ​ការ​ស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យា ដែលស្ថិតក្រោមឱវាទ និង​មាន​វិធានការបញ្ចប់មុខតំណែង និងបណ្តេញចេញពីក្របខណ្ឌ ករណីរកឃើញថា បានប្រើប្រាស់ និង​ការពាក់ព័ន្ធនឹងគ្រឿងញៀនខុសច្បាប់៕ អត្ថបទ៖ ឈិត បូរ៉ាវី