ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អញ្ជើញ​ជួប​សំណេះ​សំណាល​ជាមួយសិស្សវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស មកពីគ្រួសារក្រីក្រ និង​គ្រួសារ​ងាយរងហានិភ័យ នៅវិទ្យាស្ថានពហុបច្ចេកវិទ្យាតេជោ សែន ក្រុងតាខ្មៅខេត្តកណ្តាល ហើយ​នៅ​ក្នុងពិធីនេះ ឯកឧត្តម រដ្ឋមន្ត្រី បានស្នើអាជ្ញាធរមូលដ្ឋាន ក្រុមប្រឹក្សាឃុំសង្កាត់តាមខេត្ត សហការ​ណែនាំយុវជនគ្រួសារក្រីក្រចូលសិក្សាជំនាញ។

ឯកឧត្តម រដ្ឋមន្ត្រីថ្លែងថា បច្ចុប្បន្នរាជរដ្ឋាភិបាលកម្ពុជា កំពុង​អនុវត្ត​កម្ម​វិធី​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេសជូនយុវជន១លាន៥នាក់ សម្រាប់យុវជនស្ថិតក្នុងបន្ទុកគ្រួសារក្រីក្រ និង​គ្រួសារ​រង​ហានិភ័យ ហើយកម្មវិធីយុវជនមានកម្រិតចំណេះដឹងថ្នាក់ទី៩ គឺអាច​ចូល​រៀន​ជំនាញ​ដោយ​មិន​មានការបង់ថ្លៃសិក្សា។

ឯកឧត្តម រដ្ឋមន្ត្រី បន្តថា ការសិក្សារៀនជំនាញវិជ្ជាជីវៈនិងបច្ចេកទេស គឺផ្តល់អត្ថប្រយោជន៍ច្រើន ពោល គឺផ្តល់ឱកាសយុវជនបោះបង់សាលា យុវជវមានកម្រិតចំណេះដឹងចាប់ពីថ្នាក់ទី៩ គឺអាច​បន្ត​ការ​សិក្សាជំនាញវិជ្ជាជីវៈរបស់ខ្លួនរហូតដល់កម្រិតឧត្តមសិក្សា ចំនិញ​ថវិកា​បង់​ថ្លៃសាលា​ប្រមាណ​ជាង ៤០០ដុល្លាអាមេរិច និងឆាប់ទទួលបានការងារធ្វើ ឆាប់បានថវិកា​ប្រាក់​ខែ​ជួយ​គ្រួសារ​ដែល​ជួបការខ្វះខាតជាដើម។

ឯកឧត្តម រដ្ឋមន្ត្រី ហេង សួរ បន្តថា បច្ចុប្បន្ន ក្រសួងការងារ បានចុះហត្ថ​លេខា​លើ​កិច្ច​ព្រមព្រៀង​ជាមួយ​សភាពាណិជ្ជកម្មកម្ពុជា សមាគមន៍អ្នកសាងសង់កម្ពុជា និងក្រុមហ៊ុនធំៗមួយចំនួនទៀត ឲ្យ​ទទួលសិស្សនៅតាមវិទ្យាស្ថានបណ្តុះបណ្តាលជំនាញវិជ្ជាជីវៈនានា ចូលធ្វើ​ការងារ​ហាត់​ទទួល​បាន​ប្រាក់​ខែ​សមរម្យ និងផ្តល់ឱកាសការងារនានាទៀត ស្របទៅតាមច្បាប់ការងារ។

សូមបញ្ជាក់ថា ទូទាំងប្រទេស នៅក្នុងជំហានដំបូងនេះ គឺមានសិស្ស​ និង​ក្រុម​យុវជន​ចាស់​ក្មេង​នានា បាននិងកំពុងចូលរៀនជំនាញវិជ្ជាជីវៈកម្រិតC1នេះ មានប្រមាណ១៥០០០នាក់ នៅក្នុង​ថ្នាក់​បង្រៀន​ប្រមាណជាង៥០០ថ្នាក់ ដែលមាន៣៨មុខជំនាញ ១០វិស័យ ខណៈកម្មវិធី​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេសដល់យុវជនរបស់រាជរដ្ឋាភិបាល ១.៥ លាននាក់នេះ គឺ​បាន​ផ្តល់ការសិក្សាដោយមិនបង់ថ្លៃ ហើយសម្រាប់សិស្ស និងយុវជនណាដែលមានបណ្ណ ក្រីក្រ និង​បណ្ណងាយរងហានីភ័យ គឺរាជរដ្ឋាភិបាល​ផ្តល់​ប្រាក់​ឧបត្ថម្ភ​ប្រចាំ​ខែ​ចំនួន ២៨​ម៉ឺន​រៀន​ក្នុង​មួយ​ខែ ហើយមកដល់ពេលនេះ មានសិស្សមកពីគ្រួសារក្រីក្រ និងគ្រួសារងាយរងហានីភ័យ ប្រមាណ​ជាង ៦០០០នាក់៕ អត្ថបទ ស៊ុម សុខជា