សន្និសីទវេជ្ជសាស្ត្របេះដូងអន្តរជាតិកម្ពុជា-ឥណ្ឌូនេស៊ី ប្រចាំឆ្នាំលើកទី១ ក្រោមប្រធានបទ «ទាំង​អស់គ្នា ដើម្បីការព្យាបាលជំងឺបេះដូងកាន់តែប្រសើរ» រៀបចំដោយមន្ទីរពេទ្យមិត្តភាពខ្មែរ-សូវៀត និងមន្ទីរពេទ្យថ្នាក់ជាតិបេះដូង និងសរសៃឈាម ហារ៉ាប៉ាន គីតា(Harapan Kita) នាព្រឹក​ថ្ងៃទី២៣ ខែកុម្ភៈ ឆ្នាំ២០២៤នេះ។

សន្និសីទនេះមានការអញ្ជើញចូលរួមពីឯកឧត្តមសាស្រ្តាចារ្យ សុខ ជួរ អគ្គនាយក​រង​បច្ចេក​ទេស​សុខាភិបាល និងជាប្រធានសមាគមគ្រូពេទ្យបេះដូងកម្ពុជា និងលោកវេជ្ជបណ្ឌិត Iwan Dakota Director of National Cardiovascular Center Harapan Kita និងឯកឧត្តម លោកជំទាវ លោក លោកស្រី សាស្រ្តាចារ្យ វេជ្ជបណិ្ឌត អស់លោក-លោកស្រី ភ្ញៀវជាតិ-អន្តរជាតិ ប្អូនៗ​និស្សិត​។

ឯកឧត្តមសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត លើកឡើងថា សន្និសីទ​នេះ​រៀប​ចំ​ឡើងក្នុងគោលបំណងដើម្បីបង្កើនចំនេះដឹង ពង្រឹងសមត្ថភាព​របស់​គ្រូ​ពេទ្យ​ក្នុង​ការ​ថែទាំ​សុខ​ភាព​បេះដូងរបស់អ្នកជំងឺ និងបន្តអភិវឌ្ឍន៏ចំនេះដឹងជំនាញថ្មីៗក្នុងការថែទាំ និង​ព្យាបាល​ប្រកប​ដោយ​សុវត្ថិភាព និងប្រសិទ្ធិភាពខ្ពស់ជូនដល់អ្នកជំងឺ ព្រមទាំងការការពារហានិភ័យនាៗ ដែល​អាចកើតមានឡើងសម្រាប់អ្នកជំងឺបេះដូង និងដើម្បីការពារ និងកាត់បន្ថយ​អត្រា​កើត​ថ្មី​នៃ​ជំងឺ​បេះដូង និងសរសៃឈាមចំពោះប្រជាពលរដ្ឋក្នុងប្រទេសកម្ពុជា។

ចំណុច​ពិសេសនៃសន្និសីទនេះ គឺបានប្រមូលផ្តុំប្រធានបទដ៏ល្អៗពីវាគ្មិនថ្នាក់ជាតិ អន្តរជាតិ ដែល​មានប្រធានបទ ៨ ប្រធានបទ ក្នុងនោះដែរមានវាគ្មិនពីមន្ទីរពេទ្យថ្នាក់ជាតិបេះដូង និង​សរសៃ​ឈាម ហារ៉ាប៉ាន គីតា (Harapan Kita) ប្រទេស​ឥណ្ឌូនេស៊ីដែ​ល​ផ្តោត​សំខាន់​ទៅ​លើ​ការ​លើក​កម្ពស់​ការ​ថែទាំ និងព្យាបាលសុខភាពបេះដូង ដែលមានអ្នក​ចូល​រួម​វេជ្ជ​បណ្ឌិត​មក​មន្ទីរពេទ្យ​ថ្នាក់​ជាតិ​ដែល​មានអ្នកចូលរួមផ្ទាល់សរុប ១៥០នាក់។

លោកវេជ្ជបណ្ឌិត Iwan Dakota Director of National Cardiovascular Center Harapan Kita បានលើកឡើងថា កិច្ចសហការរបស់មន្ទីរពេទ្យថ្នាក់ជាតិបេះដូង និងសរសៃឈាម ហារ៉ាប៉ាន គីតា នៃប្រទេសឥណ្ឌូនេស៊ី នាថ្ងៃនេះ ដើម្បី​ជា​ទំនាក់​ទំនង​រវាង​ប្រទេស​ក្នុង​តំបន់​អាស៊ាន​ជាមួយ​គ្នា ហើយមនី្ទរពេទ្យនេះ ក៏ជាមជ្ឈមណ្ឌលផ្នែកជំងឺបេះដូងទាំងអស់តែម្តង។

ជាចុងក្រោយឯកឧត្តមសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត បានបញ្ជាក់ថា ក្នុងឆ្នាំ ២០២៣ កន្លងមកនេះ  មានអ្នកជំងឺដែលមកពិគ្រោះជំងឺក្រៅនៅមន្ទីរពេទ្យមិត្តភាពខ្មែរ-សូវៀត មានចំនួន ៤៧៤,២០៥ ករណី និងសម្រាកព្យាបាលមានចំនួន ៦១,៦៣៦នាក់ សរុ​ប​ទាំង​អស់​ចំនួន ៥៣៥,៨៤១ នាក់៕ អត្ថបទ រដ្ឋា