អង្គការទេសន្តរប្រវេសន៍អន្តរជាតិ(IOM) បានរាយការណ៍កាលពីថ្ងៃទី២២ ខែកុម្ភៈថា មនុស្សជាង ១៤ លាននាក់ ដែលជិតមួយភាគបីនៃចំនួនប្រជាជនអ៊ុយក្រែន ត្រូវបានបង្ខំឲ្យភៀសខ្លួនចេញពីផ្ទះសម្បែងរបស់ពួកគេ ក្នុងរយៈពេល ២ឆ្នាំ ចាប់តាំងពីប្រទេសរុស្ស៊ី បានធ្វើការឈ្លានពានពេញទំហឹងលើអ៊ុយក្រែន។

អង្គការ IOM បាននិយាយថា ចាប់តាំងពីការចាប់ផ្តើមនៃការលុកលុយទ្រង់ទ្រាយធំ នៅក្នុងខែកុម្ភៈ ឆ្នាំ ២០២២ ប្រជាជនចំនួន ៤,៥ លាននាក់ បានត្រឡប់ទៅអ៊ុយក្រែនវិញ។

ប្រជាជន៣,៧លាននាក់ផ្សេងទៀត ត្រូវបានផ្លាស់ទីលំនៅនៅក្នុងប្រទេសអ៊ុយក្រែន ខណៈដែលជិត ៦,៥ លាននាក់ ជាជនភៀសខ្លួននៅបរទេស នេះបើយោងតាមទិន្នន័យរបស់អង្គការIOM។ 

អង្គការ IOM បានឲ្យដឹងទៀតថា ខ្លួនបានផ្តល់ការគាំទ្រនៅក្នុងប្រទេសជិតខាងចំនួន ១១ ដោយ «ផ្តល់ជំនួយដ៏សំខាន់ និងសង្គ្រោះជីវិតដល់អ្នកដែលត្រូវការជំនួយខ្លាំងបំផុត»។

អង្គការនេះបានបញ្ជាក់ថា មនុស្សជាង ១៤,៦ លាននាក់ ប្រហែល ៤០ ភាគរយនៃចំនួនប្រជាជនអ៊ុយក្រែន «នៅតែត្រូវការជំនួយមនុស្សធម៌មួយចំនួន នៅឆ្នាំ ២០២៤ ខណៈដែលជនភៀសខ្លួន ២,២ លាននាក់ ត្រូវការជំនួយ នៅក្នុងប្រទេសជិតខាង»។