រដ្ឋមន្ត្រីការពារជាតិអូស្ត្រាលី លោក Richard Marles នៅថ្ងៃសុក្រ (ទី២៣ ខែកុម្ភៈ) នេះ បាននិយាយថា ប្រទេសឥណ្ឌូនេស៊ី និងអូស្ត្រាលីសង្ឃឹមថា នឹងចុះហត្ថលេខាលើកិច្ចព្រមព្រៀង ស្ដីពីកិច្ចសហប្រតិបត្តិការការពារជាតិ «ដ៏មានសារៈសំខាន់» ក្នុងរង្វង់ប៉ុន្មានខែខាងមុខនេះ។

បន្ទាប់ពីជួបជាមួយរដ្ឋមន្ត្រីការពារជាតិឥណ្ឌូនេស៊ី លោក Prabowo Subianto លោក Marles បានប្រាប់ថា៖ «ប្រទេសអូស្ត្រាលី និងឥណ្ឌូនេស៊ីមានគោលបំណងរួមគ្នា និងសន្តិសុខរួមរួមគ្នា ហើយនោះគឺជាមូលដ្ឋានដែលយើងកំពុងធ្វើដំណើរឆ្ពោះទៅមុខ»។

នៅក្នុងសេចក្តីថ្លែងការណ៍រួមមួយ លោក Prabowo ដែលស្ទើរតែ ១០០ភាគរយ ជាប្រធានាធិបតីបន្ទាប់របស់ឥណ្ឌូនេស៊ី ក្រោយការបោះឆ្នោតថ្ងៃទី១៤ ខែកុម្ភៈ បានសាទរចំពោះទំនាក់ទំនងដ៏ល្អនេះ ហើយបាននិយាយថា ប្រទេសទាំង២ មានគោលបំណងធ្វើជាអ្នកជិតខាងដ៏ល្អនឹងគ្នា។

យ៉ាងណាក្ដី រដ្ឋមន្ត្រីទាំង២ មិនបានផ្តល់ព័ត៌មានលម្អិតអំពីកិច្ចព្រមព្រៀងនេះទេ ប៉ុន្តែលោក Prabowo បានប្រាប់ថា លោករំពឹងថា ការចុះហត្ថលេខានឹងកើតមានឡើងក្នុងរយៈពេល ២ ឬ ៣ខែខាងមុខ៕