នាយករដ្ឋមន្ត្រីអង់គ្លេស លោក រីស៊ី ស៊ុណាក់ (Rishi Sunak) បានអំពាវនាវឲ្យបណ្តាប្រទេសលោកខាងលិច បង្កើនការរឹបអូសទ្រព្យសម្បត្តិរុស្ស៊ីដែលបង្កក និងបញ្ជូនទៅឲ្យអ៊ុយក្រែន ដើម្បីផ្តល់ហិរញ្ញប្បទានដល់វិស័យការពារជាតិ។

លោកស៊ុណាក់ បានសរសេរនៅក្នុងវិចារណកថាមួយនៅក្នុងកាសែត Sunday Times ដែលបានចេញផ្សាយ ដើម្បីប្រារព្ធខួបពីរឆ្នាំនៃការឈ្លានពានរបស់រុស្ស៊ីថា  ប្រទេសមួយចំនួនដែលបានដាក់ទណ្ឌកម្មរុស្ស៊ីជុំវិញការឈ្លានពានអ៊ុយក្រែនឆ្នាំ ២០២២ ត្រូវតែមានភាពក្លាហានក្នុងការរឹបអូសទ្រព្យសម្បត្តិរុស្ស៊ីរាប់រយពាន់លាន។ លោកបានសរសេរទៀតថា ដំណើរការនេះ អាចចាប់ផ្តើមជាមួយនឹងការបញ្ជូនការប្រាក់ដែលបានបង្កើតឡើងពីទ្រព្យសម្បត្តិដែលបានបង្កកទាំងនោះ ទៅឲ្យអ៊ុយក្រែន។

ការអំពាវនាវរបស់លោកស៊ុណាក់ទៅកាន់ក្រុមប្រទេសG7 ដើម្បីស្វែងរក «វិធីស្របច្បាប់» ដើម្បីរឹបអូសទ្រព្យសម្បត្តិដែលបង្កក អាចបង្ហាញពីបញ្ហាប្រឈម។ ធនាគារអន្តរជាតិ បានបង្កើនការព្រួយបារម្ភអំពីផែនការនេះ ដោយបានព្រមានរដ្ឋាភិបាលចក្រភពអង់គ្លេសថា ការរឹបអូសយកមូលនិធិរុស្ស៊ីណាក៏ដោយត្រូវតែមានមូលដ្ឋានច្បាប់យ៉ាងម៉ឺងម៉ាត់។ បើមិនដូច្នេះទេ វាប្រថុយនឹងផលប៉ះពាល់ដល់ប្រព័ន្ធហិរញ្ញវត្ថុសកល ក៏ដូចជាស្ថាប័ននានា ដែលកំពុងប្រឈមនឹងចំណាត់ការផ្លូវច្បាប់។

នៅពេលដែលសង្រ្គាមឈានចូលដល់ឆ្នាំទី៣ អ៊ុយក្រែនកាន់តែអស់សង្ឃឹមក្នុងការផ្តល់មូលនិធិ និងគ្រាប់រំសេវ ដើម្បីយកជ័យជម្នះលើកងកម្លាំងរបស់រុស្ស៊ី ។ កញ្ចប់ជំនួយចំនួន ៦០ពាន់លានដុល្លារអាមេរិក កំពុងប្រឈមមុខនឹងការជំទាស់ពីគណបក្សសាធារណរដ្ឋ ហើយលោកប្រធានាធិបតី ចូ បៃដិន (Joe Biden) កាលពីសប្តាហ៍មុនបានស្តីបន្ទោសចំពោះភាពអសកម្មរបស់សភា ដោយសារកងទ័ពរបស់ទីក្រុងមូស្គូដែលដណ្តើមបានទីក្រុង Avdiivka ភាគខាងកើតមកកាន់កាប់។ ការដួលរលំនៃទីក្រុងនេះ នៅមុនប្រា   រព្ធខួបពីរឆ្នាំនៃសង្រ្គាមនេះ បានផ្តល់ជ័យជម្នះជានិមិត្តរូបសម្រាប់លោកប្រធានាធិបតី វ្ល៉ាឌីមៀ ពូទីន ដែលចង់បន្តការគ្រប់គ្រងរបស់ខ្លួន នៅក្នុងការបោះឆ្នោត នៅខែក្រោយ។