ភ្នំពេញ ៖ លោកជំទាវបណ្ឌិត ពេជចន្ទមុន្នី ហ៊ុន ម៉ាណែត ប្រធានកិត្តិយសនៃគណៈកម្មាធិការជាតិលើកកម្ពស់សីលធម៌សង្គម តម្លៃស្រី និងគ្រួសារខ្មែរ បានមានប្រសាសន៍ទទូចស្នើដល់គ្រប់បណ្ដាភាគីពាក់ព័ន្ធទាំងអស់ត្រូវយកចិត្តទុកដាក់ និងព្យាយាមកាត់បន្ថយអត្រាហិង្សាគ្រប់ប្រភេទលើស្រ្តី ខណៈបច្ចុប្បន្ន ករណីហិង្សាលើរូបរាងកាយ និងហិង្សាផ្លូវភេទ នៅតែបន្តកើតមានលើស្រ្តី។ លោកជំទាវបណ្ឌិត មានប្រសាសន៍បែបនៅក្នុងសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅឆ្នាំ ២០២៤ របស់គណៈកម្មាធិការជាតិលើកកម្ពស់សីលធម៌សង្គម តម្លៃស្រី និងគ្រួសារខ្មែរ (គ.ជ.ស.ស.ខ) នាព្រឹកថ្ងៃទី២៧ ខែកុម្ភៈ ឆ្នាំ ២០២៤ នៅក្រសួងកិច្ចការនារី។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត មានប្រសាសន៍ថា៖ «យោងតាមរបាយការណ៍ស្រាវជ្រាវនានា បានបង្ហាញថា ស្ត្រី កម្ពុជាយើង១នាក់ ក្នុងចំណោម៥នាក់ ដែលមានអាយុពី ១៥-៤៥ឆ្នាំ ធ្លាប់រងគ្រោះដោយ អំពើហឹង្សាលើរាងកាយ។ ស្ត្រីដែលមានអាយុពី ១៥-៤៩ឆ្នាំ ចំនួន ៦% បានរាយការណ៍ថា ធ្លាប់ទទួលរងអំពើហឹង្សាផ្លូវភេទយ៉ាងហោចណាស់ម្តងក្នុង១មួយជីវិត ក្នុងនោះ៥%បាន រាយការណ៍ថា ពួកគេធ្លាប់ទទួលរងនូវការបៀតបៀនផ្លូវភេទ។» ។

លោកជំទាវបានមានប្រសាសន៍បន្តថា ផ្ទុយមកវិញបើយើងក្រឡេកទៅមើលចំណុចវិជ្ជមានរបស់ស្រ្តីស្តីកម្ពុជា គឺបានចូលរួមចំណែកយ៉ាងធំក្នុងកិច្ចគាំពារសង្គម ដែលក្នុងនោះលោកជំទាវសង្កេតឃើញ ថា ស្ត្រីខ្មែរប្រមានជាជាង ៦១% ជាម្ចាស់ និងដឹកនាំសហគ្រាសធុនមីក្រូ តូច និង មធ្យម ដែលតួលេខនេះបានឆ្លុះបញ្ចាំងឱ្យឃើញអំពីការដើរតួនាទីយ៉ាងសំខាន់បស់ស្ត្រីខ្មែរ ក្នុងការបង្កើនប្រាក់ចំណូល កាត់បន្ថយភាពក្រីក្រ និងកែលម្អសុខុមាលភាពគ្រួសារនាពេល បច្ចុប្បន្ននេះ។ 

ក្នុងនាមជាប្រធានកិត្តិយសនៃគណៈកម្មាធិការជាតិលើកកម្ពស់សីលធម៌សង្គម តម្លៃស្រី និងគ្រួសារខ្មែរ លោកជំទាវបាន លើកឡើងបន្ថែមទៀតថា នៅពេលដែលយើងខិតខំពង្រឹង សីលធម៌សង្គម តម្លៃស្ត្រី និង គ្រួសារខ្មែរ យើងក៏មិនអាចមើលរំលងអំពើហិង្សាក្នុងគ្រួសារ ដែលអំពើហិង្សាលើស្រ្តីខ្មែរនៅបន្តកើតមានជាញឹកញាប់ ហើយរាជរដ្ឋាភិបាលបាននឹងកំពុងបន្តយកចិត្តទុកដាក់ក្នុងការដោះស្រាយ នូវរាល់បញ្ហាដែលកើតមាន៕ អត្ថបទ៖ កញ្ញា ចេន សុភានាថ