ភ្នំពេញ ៖ ក្រុមវិនិយោគិនជនជាតិចិន ហុងកុង និងម៉ាកាវ ចំនួនប្រមាណ១០០នាក់ បានអញ្ញើញចូលរួមសិក្ខាសាលាក្រោមប្រធានបទស្តីពី បច្ចុប្បន្នភាពនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដើម្បីស្វែងយល់ពីសក្តានុពលនៃការធ្វើពាណិជ្ជកម្ម និងការវិនិយោគនៅក្នុងប្រទេសកម្ពុជា ដែលប្រព្រឹត្តទៅក្រោមអធិបតីភាពរបស់លោកជំទាវ ខា ឡេង រដ្ឋលេខាធិការក្រសួងពាណិជ្ជកម្ម។

​នៅក្នុងពិធីបើកសិក្ខាសាលា កាលពីរសៀលថ្ងៃទី២៨ ខែកុម្ភៈកន្លងទៅ លោកជំទាវរដ្ឋលេខាធិការ បានមានប្រសាសន៍ថា ការរៀបចំកម្មវិធី គិតត្រឹមខែមករា ឆ្នាំ២០២៤ ទំហំពាណិជ្ជកម្ម រវាងកម្ពុជា និងចិន សរុបមានចំនួនជាង ១ពាន់ ១៥០លានដុល្លារអាម៉េរិក ដោយក្នុងនោះ ទំហំដែលបាននាំចេញពីកម្ពុជាទៅចិន មានចំនួនប្រមាណ ១២១,៧៣លានដុល្លារអាម៉េរិក ហើយទំហំនាំចូលពីចិនមកកម្ពុជា មានចំនួនជាង ១ពាន់ ៣២លានដុល្លារអាម៉េរិក ដែលមានការកើនឡើងចំនួន ១៨,៧០% បើធៀបនឹងរយៈពេលដូចគ្នាក្នុងឆ្នាំ២០២៣កន្លងទៅ។ 

លោកជំទាវបានបន្តថា ដោយឡែក ទំហំពាណិជ្ជកម្ម និងប្រទេសជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ មានចំនួនសរុបជាង ២ពាន់ ៧៤៦លានដុល្លារ មានការកើនឡើងចំនួនជាង ២១% ដែលនេះបានបង្ហាញពីសមត្ថភាពពាណិជ្ជកម្មដ៏មមាញឹក និងខ្លាំងក្លារបស់កម្ពុជាជាមួយបណ្តាប្រទេសជាដៃគូ ជាពិសេសគឺមិត្តចិន ដែលជាសញ្ញាវិជ្ជមានបង្ហាញជូនដល់បណ្តាវិនិយោគិនទាំងក្នុងនិងក្រៅប្រទេសបានឃើញយ៉ាងច្បាស់ពីការអភិវឌ្ឍ និងភាពរីកចម្រើននៃកម្ពុជា បើទោះបីជាស្ថិតក្នុងស្ថានភាពមិនប្រាកដប្រជានៃវិបត្តិសកលនានាយ៉ាងណាក្តី ក៏ប្រទេសកម្ពុជានៅតែរក្សាបានគោលជំហរនឹងនរសម្របបានគ្រប់កាលៈទេសៈ និងស្វាគមន៍រាល់វិនិយោគិនមកពីគ្រប់ទិសទី ដោយគ្មានការរើសអើងណាមួយឡើយ។

ក្នុងអង្គសិក្ខាសាលានេះ ភាគីកម្ពុជាបានបង្ហាញអំពីសក្តានុពលចម្បង ដែលសមស្របសម្រាប់ការធ្វើពាណិជ្ជកម្ម និងការវិនិយោគ ជូនដល់ក្រុមវិនិយោគិនមកពីចិន ហុងកុង និងម៉ាកាវ មានដូចជា បង្ហាញពីស្នាដៃដឹកនាំក្នុងរយៈពេល ៤០ឆ្នាំ របស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ដែលរក្សានូវសុខសន្តិភាពពេញលេញ ស្ថិរភាព សន្តិសុខ និងសុវត្ថិភាព ដែលជួយឲ្យប្រជាពលរដ្ឋរស់នៅប្រកបដោយភាពសុខដុម ហើយនាពេលបច្ចុប្បន្ន ក្នុងអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត បានបន្តប្តេជ្ញាថែរក្សាការពារកត្តាទាំងនេះ ជូនដល់ប្រជាជនក្នុងប្រទេស ដែលនឹងនាំមកនូវការអភិវឌ្ឍប្រកបដោយចីរភាព និងភាពរីកចម្រើនថ្មីៗបន្ថែមទៀត និងបានបង្ហាញបន្ថែមពីទីផ្សារ ក៏ដូចជាការលើកទឹកចិត្តរបស់រាជរដ្ឋាភិបាលកម្ពុជា អំពីសេដ្ឋកិច្ចបើកចំហរ និងទីផ្សារសេរីធំទូលាយដែលមានសក្តានុពលខ្ពស់ចំពោះការនាំចេញទៅកាន់បណ្តាប្រទេសក្នុងតំបន់ និងពិភពលោកជាដើម។ល៕

អត្ថបទ​ ៖ ឈិត បូរ៉ាវី