កំពង់ឆ្នាំង៖ នៅព្រឹកថ្ងៃទី០៥ ខែមីនា ឆ្នាំ២០២៤នេះ នៅសាលាដំបូងខេត្តកំពង់ឆ្នាំង បាន​បើក​យុទ្ធនាការ​ធ្វើតេស្តរកសារធាតុញៀនដល់មន្ត្រីទាំងអស់ បូករួមទាំងឯកឧត្តមប្រធានសាលាដំបូង និង​ឯកឧត្តមព្រះរាជអាជ្ញាផង ដែលជាលទ្ធផល គឺរកពុំឃើញមានថ្នាក់ដឹកនាំ ឬមន្ត្រីណាម្នាក់​មាន​ពាក់​ព័ន្ធ​នឹង​សារធាតុញៀននោះឡើយ។ រាជរដ្ឋាភិបាលអាណត្តិថ្មី បានធ្វើបន្តពី​រាជរដ្ឋាភិបាល​អាណត្តិ​មុន កុំឱ្យបញ្ហាគ្រឿងញៀន ក្លាយជាជំងឺមហារីកកាន់តែធ្ងន់ទៅៗ នាំឱ្យប៉ះពាល់​ដល់​ប្រទេស​ជាតិ​ទាំងមូលនាំទុក្ខដល់ប្រជាពលរដ្ឋទូទៅ។

ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំងបានថ្លែងថា សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញយុទ្ធនាការ​ប្រយុទ្ធ​ប្រឆាំង​គ្រឿងញៀន​បន្ថែម​ទៀត​ក្នុង​អាណត្តិ​ថ្មី​នេះ ដើម្បីឈានដល់ការប្រយុទ្ធប្រឆាំងជាមួយបទល្មើសផ្សេងៗ និងបញ្ហាមិន​ប្រក្រតី​នានា​ដែលកើតឡើងនៅក្នុងសង្គម គឺត្រូវផ្តើមចេញពីការសម្អាតខ្លួនឯងជាមុនសិន ពោល​គឺ​ការ​សម្អាតផ្ទះ ដែលសំដៅដល់ការរកឱ្យឃើញមន្ត្រីធ្វើខុសពាក់ព័ន្ធបទល្មើសផ្សេងៗ ពិសេស គឺ​មក​ពី​គ្រឿង​ញៀនទាំងនេះហើយ ដែលនាំឱ្យឈាន​ទៅ​ដល់​ការ​បើក​យុទ្ធនាការណ៍​ធ្វើ​តេស្ត​រក​សារធាតុ​ញៀន ក្នុងចំណោមមន្ត្រីរាជការ កងកម្លាំងទាំងអស់ ដើម្បីធ្វើយ៉ាងណា​កម្លាំង​អនុវត្ត​ច្បាប់​ត្រូវ​សម្អាត​ខ្លួនជាមុនសិន ទើបប្រសិទ្ធភាពនៃការអប់រំណែនាំតម្រង់ទិស ដល់មហាជនទូទៅ មានប្រសិទ្ធភាព និងធ្វើឱ្យការបង្ហ្រាបបទល្មើសគ្រឿងញៀនផ្សេងៗមានប្រសិទ្ធភាព ។

ប្រជាពលរដ្ឋ​ក្នុងខេត្តកំពង់ឆ្នាំង បានថ្លែងថា៖ ក្នុងនាមជាប្រជាពលរដ្ឋខ្មែរ ពួកគាត់ពិត​ជា​សប្បាយ​ចិត្ត​យ៉ាងខ្លាំងបំផុត និងគាំទ្រយ៉ាងពេញទំហឹងចំពោះសម្ដេចធិបតី ហ៊ុន ម៉ាណែត ក្នុង​ការ​ដាក់​ចេញ​វិធានការ​យ៉ាង​ម៉ឺងម៉ាត់​ក្នុង​ការ​ប្រយុទ្ធ​ប្រឆាំង​គ្រឿងញៀន​ខុស​ច្បាប់​នៅ​តាម​ក្រសួង​ស្ថាប័ន និងរដ្ឋបាលថ្នាក់ក្រោមជាតិ ព្រោះបញ្ហាគ្រឿងញៀន គឺជាដំបៅដ៏អាក្រក់មួយក្នុងសង្គម ហើយ​បើ​កាលណាមនុស្សណាម្នាក់បានជ្រុលសេពគ្រឿងញៀន តែងធ្វើឱ្យបាត់បង់សតិ និង​ធ្វើ​អ្វីៗ​បង្ក​គ្រោះថ្នាក់ដល់អ្នកដទៃ និងរហូតដល់សង្គមថែមទៀត។ ហេតុនេះសម្រាប់វិធានការរបស់រាជរដ្ឋាភិបាលក្នុងការប្រយុទ្ធប្រឆាំងគ្រឿងញៀនគឺជារឿងមួយដ៏ល្អ ដើម្បីធ្វើយ៉ាងណាប្រែក្លាយយុវជនកម្ពុជា អោយចៀសឆ្ងា​យ​ពី​គ្រោះថ្នាក់​កើត​ចេញ​ពី​គ្រឿង​ញៀននេះ ព្រោះពួកគេ ជាទំពាំងស្នងឬស្សីត្រូវតែស្អាតស្អំ និងប្រកបដោយសមត្ថភាព សម្រាប់​បន្ត​វេនអភិវឌ្ឍន៍ប្រទសជាតិ។

ប្រជាពលរដ្ឋខេត្តកំពង់ឆ្នាំងបានបង្ហាញការសាទរ និងគាំទ្រយ៉ាងពេញទំហឹងនូវវិធានការ​ដ៏ម៉ឺងម៉ាត់​របស់​សម្តេចធិបតី ហ៊ុន ម៉ាណែត នាយករដ្ឋមន្រ្តី ក្នុងការប្រយុទ្ធប្រឆាំង​គ្រឿង​ញៀន​ខុស​ច្បាប់ ។ ការបង្រ្កាបជាមួយវិធានការដាច់ខាតរបស់ប្រមុខរដ្ឋាភិបាលនេះ គឺដើម្បីអោយ​ប្រទេស​មួយ​ស្អាតស្អំ គ្មានគ្រឿងញៀន និងនាំអោយយុវជនប្រកបដោយចំណេះដឹង ដែលទាំង​អស់​នេះ គឺជាកត្តាមិន​អាច​ខ្វះបា​ន​ក្នុង​ការ​ចូល​រួម​ចំណែក​ក្នុង​ការ​អភិវឌ្ឍ​សង្គម​ជាតិ​យើង​អោយ​កាន់​តែ​រុង​រឿងក្រោមម្លប់សុខសន្តិភាព ៕ កាំង ហុងវាស្នា