បាល់ទាត់៖ ក្រុមព្រះខ័នរាជស្វាយរៀងបានយកឈ្នះក្រុមភ្ញៀវសូលទីឡូអង្គរ ដោយលទ្ធផល ២-១ ទាំងប្រផិតប្រផើយក្នុងជំនួបសប្ដាហ៍ទី៧ នៃពានរង្វាន់មិត្តហ្វូនខេមបូឌានលីគ ស្របពេលក្រុមមានមូលដ្ឋាននៅខេត្តសៀមរាបនេះ បានដឹកនាំការប្រកួតដោយគ្រូបង្វឹកថ្មីលើកដំបូងគឺលោក អ៊ុក សុធី កាលពីចុងសប្ដាហ៍កន្លងទៅ។
ជំនួបក្រោមតំណក់ទឹកភ្លៀងនេះ ព្រះខ័នរាជស្វាយរៀងបានបើកការនាំមុខក្រុមភ្ញៀវ ១គ្រាប់មុននៅចុងវគ្គទី១ ពីការតែតរបស់កីឡាករ Privat នៅនាទី៤៥+១។ ប៉ុន្ដែក្រោយចូលវគ្គទី២ បាន ៣នាទី ក្រុមសូលទីឡូអង្គរក៏តាមស្មើ ១-១ វិញ ដែលជាគ្រាប់បាល់តែតបញ្ចូលទីដូចគ្នា ពីកីឡាករជប៉ុន Reo Kageyama នៅនាទី៤៨។ បន្ទាប់ពីត្រូវក្រុមភ្ញៀវតាមស្មើ ក្រុមជើងឯករងឆ្នាំចាស់ព្យាយាមដាក់សម្ពាធកាន់តែខ្លាំងរហូតដល់នាទី៦៦ ដោយការធ្វេសប្រហែលរបស់អ្នកចាំទីសូលទីឡូអង្គរ នាង សុផាន់និត បានបោះបាល់ទៅត្រឹមខ្សែបម្រើ Kobayashi Daisuke ហើយកីឡាករជប៉ុនរូបនេះបានស៊ុតពីចម្ងាយបានសម្រេចនៅនាទី៦៦ ហើយក៏ជាគ្រាប់បាល់ជ័យជម្នះសម្រាប់ក្រុមព្រះខ័នរាជស្វាយរៀងតែម្ដង។
តាមរយៈការដណ្ដើមបាន ៣ពិន្ទុក្នុងដីនេះនាំឲ្យក្រុមលោក Conor Nestor រំកិលទៅឈរលេខ៤ ជាបណ្ដោះអាសន្នបន្ទាប់ពីឆ្លងកាត់ ៦ប្រកួតឈ្នះ ៤ និងចាញ់ ២ រកបាន ១២ពិន្ទុស្មើក្រុមបឹងកេត និងវិសាខា មុនព្រះខ័នរាជស្វាយរៀងត្រូវធ្វើដំណើរទៅជួបក្រុមភ្នំពេញក្រោន នាថ្ងៃទី១៥ ខែកក្កដាសប្ដាហ៍នេះនៅកីឡដ្ឋាន Smart RSN ។ រីឯក្រុមសូលទីឡូអង្គរបានបន្ដបរាជ័យជាលើកទី៦ និងមិនទាន់មានពិន្ទុរាប់ឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
