បាល់ទាត់៖ ក្រុមការពារតំណែងជើងឯកបឹងកេតបានទទួល ៣ពិន្ទុបន្ថែមក្នុងការប្រកួតពានរង្វាន់មិត្តហ្វូនខេមបូឌានលីគសប្ដាហ៍ទី៧ ទាំងលំបាក បន្ទាប់ពីយកឈ្នះក្រុមភ្ញៀវគិវីវង់សុខសែនជ័យ ១-០ នៅនាទីចុងក្រោយដែលធ្វើសម្រេចដោយកីឡាករ ឱ ភារុណ។
ជំនួបដ៏តានតឹងនៅកីឡដ្ឋានខេមបូឌាអ៊ែរវ៉េកាលពីចុងសប្ដាហ៍កន្លងទៅ ក្រុមនាគខៀវបឹងកេត និងគិរីវង់សុខសែនជ័យស្ទើរតែចែកគ្នា ១ពិន្ទុម្នាក់ទៅហើយ បន្ទាប់ពីចំណាយពេលអស់ ៩០នាទីពុំមានក្រុមណាអាចស៊ុតបំប៉ោងសំណាញ់ទីគ្នាបានឡើយ។ ប៉ុន្ដែនៅនាទីបន្ថែមចុងក្រោយនៃវគ្គទី២ មុនអាជ្ញាកណ្ដាលផ្លុំកញ្ចែបញ្ចប់ការប្រកួត កីឡាករ ឱ ភារុណ ក៏ធ្វើបានសម្រេច ១គ្រាប់នៅនាទី៩០+៥ ដែលជួយឲ្យក្រុមបឹងកេតស្គាល់ជ័យជម្នះលើកទី៤ និងជាជ័យជម្នះក្នុងដីលើកដំបូងក្នុងឆ្នាំ២០២១ ដ្បិតកាលពីដើមរដូវកាលពួកគេបានចាញ់ក្នុងដីផ្ទួនៗ គឺចាញ់ណាហ្គាវើលដ៏ ១-០ និងចាញ់ភ្នំពេញក្រោន ២-១។
តាមរយៈជ័យជម្នះលើក្រុមគិរីវង់សុខសែនជ័យនេះដែរ បានធ្វើឲ្យក្រុមជើងឯក ៤សម័យបឹងកេតរក្សាកៅអី Top-6 បណ្ដោះអាសន្នដោយរកបាន ១២ពិន្ទុស្មើក្រុមព្រះខ័នរាជស្វាយរៀង និងវិសាខា បន្ទាប់ពីឆ្លងកាត់ ៧ប្រកួតឈ្នះ ៤ និងចាញ់ ៣។ រីឯគិរីវង់បានធ្លាក់មកឈរលេខ៨ ដោយរក្សា ៩ពិន្ទុក្នុងដៃជាមួយលទ្ធផល ៦ប្រកួតឈ្នះ ៣ និងចាញ់ ៣ប្រកួត៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
