ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ កោត​សរសើរ​ដោយស្មោះចំពោះយោធិននារីគ្រប់រូប ដែលកន្លងមកនេះ បាន​បំពេញ​បេសក​កម្ម​ប្រកប​ដោយ​ភាពអំណត់ព្យាយាម ពុះពារគ្រប់ឧបសគ្គ ដើម្បីចូលរួម​ចំណែក​ក្នុង​បុព្វ​ហេតុ​ការពារ​ឯករាជ្យ សន្តិភាព បូរណភាពទឹកដី និងសេចក្តីសុខក្សេមក្សាន្តរបស់ប្រជាពលរដ្ឋ ។

ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ក្នុង​ឱកាស​អញ្ជើញជាអធិបតីភាពក្នុងពិធីអបអរសាទរទិវានារីអន្តរជាតិ ៨ មីនា ខួបលើកទី១១៣ និង​ពិធី​ប្រកាស​ដាក់ឱ្យប្រើប្រាស់ផែនការយុទ្ធសាស្រ្តបញ្រ្ជាបយេនឌ័រក្រសួងការពារជាតិ ឆ្នាំ២០២៤-២០២៨ នៅថ្ងៃទី០៧ ខែ មីនា នេះ បានណែនាំដល់មេបញ្ជាការ មេបញ្ជាការរង តាម​បណ្តា​កង​ឯក​ភាព នៃកងយោធពលខេមរភូមិន្ទ ទាំងអស់ ត្រូវបន្តយកចិត្តទុកដាក់ដល់យោធិននារី ត្រូវ​បន្ត​ផ្តល់​ឱកាស និងបង្កលក្ខណៈឱ្យនារី បានបង្កើន សមត្ថភាពចំណេះដឹង និងបំពេញ​តួនាទី​ភារកិច្ច​ឱ្យ​កាន់​តែ​ប្រសើរឡើង។ ត្រូវផ្ដោតការយកចិត្តទុកដាក់លើ ការធានាឱ្យបាន​នូវ​ការ​កសាង​អ្នក​ដឹកនាំ​ឌីជីថល ជាពិសេសចំពោះយុវជនបន្តវេន ដើម្បីជំរុញឱ្យការធ្វើអន្តរ កម្មរបស់​យោធិន​គ្រប់​រូប​នៅ​ក្នុង​ប្រព័ន្ធអេកូឡូស៊ីនៃសេដ្ឋកិច្ច និងសង្គមឌីជីថល កាន់តែមានប្រសិទ្ធភាព និង​សក្ដិ​សិទ្ធភាព​។

ឯកឧត្ដម បានរំលឹកថា ទិវាអន្តរជាតិនារី ៨ មីនា ដែលបានរៀបចំប្រារព្ធនាពេលនេះ ដើម្បីរំលឹកពី ភាព​អង់​អាចក្លាហាន នៃការតស៊ូទាមទារសិទ្ធិសេរីភាពស្មើគ្នារបស់នារី និងឆ្លុះ​បញ្ចាំង​អំពី​វឌ្ឍនភាព សមិទ្ធផល បញ្ហាប្រឈម ការប្តេជ្ញាចិត្ត និងវិធានការជាវិជ្ជមាននានា ក្នុងការលើក​កម្ពស់​សមភាព​យេនឌ័រ បង្កើនភាពអង់អាច និងតម្លៃយោធិននារី​គ្រប់រូប​នៅ​ក្នុង​កង​យោធ​ពល​ខេមរ​ភូ​មិន្ទ ។

យោធិននារី បានបង្ហាញនូវក្ដីអំណរគុណចំពោះរាជរដ្ឋាភិបាល ចាប់តាំងពីការដឹកនាំរបស់សម្តេច តេជោ ហ៊ុន សែន អតីតនាយករដ្ឋមន្រ្តី និងបន្តមកសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីបច្ចុប្បន្ន តែងតែបានយកចិត្តទុកដាក់ និងលើកកម្ពស់តម្លៃយោធិននារី ឱ្យ​ចូល​រួម​ការងារ​គ្រប់​បែបយ៉ាងដូច បុរសផងដែរ។ ពួកគេបាន​ប្តេជ្ញាបង្កើនសមត្ថភាពថែមទៀត ពិសេសជំនាញឌីជីថលនាពេលចុងក្រោយនេះ ដើម្បី ធ្វើឱ្យការប្រតិបត្តិការងារកាន់តែមានប្រសិទ្ធភាព ។

រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត បានកំណត់ការ លើក​កម្ពស់​សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រី នៅគ្រប់​វិស័យ​ជា​អាទិភាព ក្នុងរបៀបវារៈគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាម​រយៈ​ការ​ពង្រឹងភាពជា ពលរដ្ឋក្នុងសង្គម ដែលមានអារ្យធម៌ខ្ពស់ប្រកបដោយសីលធម៌ សមធម៌ និង​បរិយាបន្ន៕ អត្ថបទ៖ ទូច សោភ័ណ