ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាន​អញ្ជើញ​ចូលរួម​ស្តាប់​បទ​បង្ហាញ​ស្តីពី វឌ្ឍនភាព នៃការរៀបចំ​ផែនទី​តំបន់​ងាយ​រង​គ្រោះ​ដោយ​ទឹក​ជំនន់​នៅប្រទេស​កម្ពុជា ដើម្បីត្រៀមទប់ស្កាត់អំពីផលប៉ះពាល់ដល់ដំណាំដាំដុះ។

យោងតាមក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី៧ មីនា ឆ្នាំ២០២៤នេះ បាន​បញ្ជាក់​ឲ្យ​ដឹងថា បន្ទាប់ពីបានទទួលស្តាប់បទបង្ហាញរួចមក ឯកឧត្តមរដ្ឋមន្ត្រី បានណែនាំ​ដល់​ក្រុម​ការងារ​ឱ្យស្រង់ទិន្នន័យចាប់ពីឆ្នាំ២០២០ ដល់ឆ្នាំ២០២៣ ដើម្បីយកមកសិក្សាឈ្វេងយល់ និង​ប្រៀបធៀបឱ្យបានច្បាស់លាស់ពីស្ថានភាពទឹកជំនន់ ដែលបង្ក​ផល​ប៉ះពាល់​ដល់​វិស័យ​កសិកម្ម ជាពិសេសដំណាំស្រូវ។

បើតាមឯកឧត្តមរដ្ឋមន្ដ្រី លទ្ធផលនេះ នឹងក្លាយជាមូលដ្ឋានដ៏សំខាន់ ដើម្បី​អនុញ្ញាត​ឱ្យ​ក្រសួង និង​ស្ថាប័នពាក់ព័ន្ធទាំងអស់ ឆ្លើយតបនឹងបញ្ហាប្រឈមបានកាន់តែប្រសើរ និងទាន់ពេលវេលា ព្រម​ទាំង​កាត់បន្ថយហានិភ័យផលិតកម្ម។

ជាមួយគ្នានេះដែរ ឯកឧត្តមរដ្ឋមន្ត្រី បានណែនាំបន្ថែមដល់ក្រុមការងារ ត្រូវ​សិក្សា​បន្ថែម​ពី​មុខងារ​ផ្កាយរណប (Satellite) នៃកម្មវិធី MAPscape ឱ្យបានច្បាស់លាស់ ដើម្បី​ប្រើប្រាស់​ក្នុង​ការងារ​វាយ​តម្លៃ​តំបន់​រងហានិភ័យទឹកជំនន់នេះឱ្យមានប្រសិទ្ធភាពខ្ពស់៕ អត្ថបទ៖ ឈិត បូរ៉ាវី