លោកជំទាវ ហ៊ូ និរមិត្តា រដ្ឋលេខាធិការក្រសួងកិច្ចការនារី ថ្លែងថា ស្រ្តីក្នុងវិស័យនយោបាយ និង​សាធារណៈ​កើនឡើង ខណៈរាជរដ្ឋាភិបាលកំណត់អាទិភាពជំរុញលើបញ្ហាវិសមភាពយេនឌ័រ។

ថ្លែងប្រាប់ BTV នៅថ្ងៃទី៧ ខែមីនា ឆ្នាំ២០២៤ ស្របពេលកម្ពុជាអបអរសាទរទិវាអន្តរជាតិនារី ៨ មីនា ខួបទី១១៣ ក្រោមមូលបទ «ស្រ្តី និងក្មេងស្រី ក្នុងបរិវត្តកម្មឌីជីថល» លោកជំទាវ ហ៊ូ និរមិត្តាបញ្ជាក់ថា ក្រោមការដឹកនាំរបស់រាជរដ្ឋាភិបាលរបស់សម្តេចតេជោ ហ៊ុន សែន អតីត​នាយករដ្ឋ​មន្រ្តី និងបន្តរហូតមកសម្តេចធិបតី ហ៊ុន ម៉ាណែត នាយករដ្ឋមន្រ្តី បានបន្តកសាង និង​អនុវត្ត​ការ​គាំទ្រដល់ការលើកកម្ពស់សមភាពយេសឌ័រដល់ស្រ្តីជានិច្ច។ ក្នុងនោះលោកជំទាវបញ្ជាក់ថា គិតត្រឹមឆ្នាំ២០២៤នេះ តួនាទីរបស់ស្រ្តីក្នុងវិស័យសាធារណៈ និង​នយោបាយ​បន្តកើនឡើង ដែលបង្ហាញជាសញ្ញាវិជ្ជមានស្របតាមយុទ្ធសាស្រ្តបញ្ចកោណ ដំណាក់​កាលទី១ របស់រាជរដ្ឋាភិបាល។

ជាមួយគ្នា លោកជំទាវ បញ្ជាក់ទៀតថា រាជរដ្ឋាភិបាល​មាន​គោល​ដៅ​ជំរុញ​ឱ្យសមភាព​យេនឌ័រ​រវាង​ស្រ្តី និងបុរស មានសម្ទុះកំណើនក្នុងការងារមិនថាវិស័យរដ្ឋ និងឯកជនឱ្យ​មាន​ការវិវឌ្ឍន៍​ដូច​គ្នា ដោយសារតំណែង និងតួនាទីនីមួយៗមិនមានការកំណត់សម្រាប់តែស្រ្តី ឬបុរសតែ​ម្នាក់​នោះ​ទេ ប៉ុន្តែចំណុចដែលសំខាន់នោះ គឺផ្អែកលើសមត្ថភាព។

សូមជម្រាបថា កម្ពុជាតែងតែប្រារព្ធទិវាសិទ្ធិនារីអន្តរជាតិ ៨ មីនា ដើម្បីរំលេចអំពីសក្តានុពល និង​ភាព​ចាំបាច់​នៃការលើកកម្ពស់ការចូលរួមរបស់ស្ត្រី និងក្មេងស្រី​ក្នុង​វិស័យ​ឌីជីថល​ប្រកប​ដោយ​ប្រសិទ្ធ​ភាព និងសុវត្ថិភាព និងជាការឆ្លើយ​តប​នឹង​បរិបទ​នៃ​ការ​វិវឌ្ឍន៍​របស់​សង្គម​នៅ​ក្នុង​យុគ​សម័យ​ឌីជីថល និងស្របតាមចក្ខុវិស័យ ដែលបានចង្អុលបង្ហាញនៅក្នុងយុទ្ធសាស្ត្រ បញ្ច​កោណ​ ដំណាក់កាលទី១ របស់​រាជរដ្ឋាភិបាល​កម្ពុជា​ក្រោម​ការ​ដឹកនាំ​ប្រកប​ដោយ​កិត្តិ​បណ្ឌិត​របស់​សម្តេច​មហា​បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង​ក្រប​ខណ្ឌ​គោល​នយោបាយ​ក្នុង​ការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រី៕ អត្ថបទ សេក ឧត្តម