គ្រូពេទ្យម្នាក់នៅមន្ទីរពេទ្យធំតំបន់ហ្សា បាននិយាយកាលពីថ្ងៃសុក្រថា ការ​ទម្លាក់​ជំនួយ​មនុស្ស​ធម៌​ពី​លើអាកាស នៅភាគខាងជើងនៃដែនដីប៉ាឡេស្ទីន បណ្តាលឲ្យមនុស្ស ៥នាក់ស្លាប់ និង១០​នាក់​រងរបួស។

គិលានុបដ្ឋាយិកានៅបន្ទប់សង្គ្រោះបន្ទាន់ លោក Mohammed al-Sheikh បាន​ប្រាប់​សារ​ព័ត៌មាន AFP ថា អ្នកស្លាប់និងអ្នករងរបួស ត្រូវបានបញ្ជូនទៅមន្ទីរពេទ្យ Al-Shifa ទីក្រុងហ្កាហ្សា ។ លោក Sheikh បាននិយាយថា ការទម្លាក់ជំនួយបណ្តាលឲ្យមនុស្សស្លាប់នេះ បាន​កើត​ឡើង​នៅ​ភាគ​ខាង​ជើងជំរំជនភៀសខ្លួន តំបន់ឆ្នេរ Al-Shati ។

សាក្សីម្នាក់មកពីជំរំបាននិយាយ ថាលោកនិងបងប្រុស បានទៅ​តាម​ជំនួយ​ដែល​ទម្លាក់​តាម​ឆ័ត្រ​យោង​ដោយ​សង្ឃឹមថានឹងទទួលបាន ថង់ម្សៅ។ បន្ទាប់មក ភ្លាមៗនោះ ឆ័ត្រយោងមិន​រលាស់​បើក​ ហើយបានធ្លាក់ចុះមកដូចគ្រាប់រ៉ុក្កែត នៅលើដំបូលផ្ទះមួយ។ ដប់នាទីក្រោយមក ខ្ញុំបាន​ឃើញ​មនុស្សជាច្រើននាក់បានរងរបួស ដែលកំពុងស្ថិត​នៅ​លើ​ដំបូល​ផ្ទះ​ជា​កន្លែង​កញ្ចប់​ជំនួយ​បាន​ធ្លាក់​ចុះ។

សហរដ្ឋអាមេរិក និងប្រទេសហ្ស៊កដានី ស្ថិតក្នុងចំណោម​ប្រទេស​ដែល​បានអ​នុវ​ត្ត​ការ​ទម្លាក់​ជំនួយពីយន្តហោះនៅភាគខាងជើងតំបន់ហ្កាហ្សា ជាកន្លែងដែល​មនុស្ស​រាប់​សែន​នាក់​កំពុង​ប្រឈម​មុខទៅនឹងស្ថានភាពធ្ងន់ធ្ងរ បន្ទាប់ពីសង្គ្រាមជាងប្រាំខែ។ ដោយនិយាយ​សំដៅ​ទៅ​លើ​អ្នក​ស្លាប់ទាំងប្រាំនាក់កាលពីថ្ងៃសុក្រ ការិយាល័យប្រព័ន្ធផ្សព្វផ្សាយរបស់រដ្ឋាភិបាល នៅ​តំប​ន់​ហ្កាហ្សា​គ្រប់គ្រងដោយក្រុមហាម៉ាសបាននិយាយថា ការទម្លាក់ជំនួយតាមអាកាសគឺ «ឥត​ប្រយោជន៍​» ហើយ «ពុំមែនជាមធ្យោបាយល្អ សម្រាប់បំណងផ្តល់ជំនួយចូលមកនោះទេ» ។ អង្គការសហប្រជាជាតិបាននិយាយថា ការទម្លាក់ជំនួយពីយន្តហោះ ឬតាមច្រក​របៀង​ជំនួ​យ​តាម​សមុទ្រ ដែលបានស្នើឡើង មិនអាចជំនួសបានសម្រាប់ការដឹកជញ្ជូនតាមផ្លូវគោកនោះទេ ដោយ​ជំរុញ​ឱ្យ​រថយន្តដឹកទំនិញកាន់តែច្រើន ត្រូវបានអនុញ្ញាតឱ្យចូលទៅដល់តំបន់ហ្កាហ្សា តាមរយៈ​ច្រក​ព្រំដែន​បន្ថែមទៀត៕