ភ្នំពេញ៖ មន្រ្តីអ្នកនាំពាក្យក្រសួងពាណិជ្ជកម្ម លើកឡើងថា រហូតមកដល់ពេលនេះ ការ​បញ្ជា​ទិញ​ពី​កម្ពុ​ជានៅតែមាន ខណៈទំហំពាណិជ្ជកម្ម កម្ពុជា-អន្ដរជាតិ មានការរីកចម្រើនជាលំដាប់។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បាន​មាន​ប្រសាសន៍​បញ្ជាក់​ថា ទំនាក់ទំនងកម្ពុជា និងអន្តរជាតិ ជាពិសេសការនាំចេញរបស់កម្ពុជា​នៅក្នុង​បណ្ដា​ប្រទេស​ជា​សមាជិក នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ហៅកាត់ អាសិប (RCEP) បានស្តែងឡើងនូវទំហំពាណិជ្ជកម្ម ដែលរីកចម្រើនជាលំដាប។

ឯកឧត្តម បានបញ្ជាក់បន្ថែមថា ទោះបីជាមានវិបត្តិសង្គ្រាមក្ដី កម្លាំងទិញថយចុះក្ដី ប៉ុន្តែការ​បញ្ជា​ទិញ​ទំនិញ​កម្ពុជា នៅតែមាននៅឡើយ នៅតែរក្សាបាននូវទំហំនៃការបញ្ជាទិញ អត់​មាន​ការ​ថម​ថយ ទោះបីជាមានការថមថយ ចំពោះមុខទំនិញខ្លះ តែវាទៅកើនលើមុខទំនិញខ្លះទៀត។ ជាក់​ស្តែង កម្ពុជានៅតែប្រទេសលេខ១ ក្នុងការនាំចេញកង់ និងជាប្រទេស នាំចេញគ្រឿងបន្លាស់ គ្រឿង​បង្គុំ ផ្ទាំងសូឡាទៅកាន់ទីផ្សារអន្តរជាតិ។

សូមជម្រាបថា គិតក្នុងខែមករា ឆ្នាំ២០២៤នេះ កម្ពុជាបាននាំចេញទំនិញ មានទឹក​ប្រាក់​ប្រមាណ​ជិត ២ពាន់លានដុល្លារ ទៅកាន់បណ្តាប្រទេសដៃគូពាណិជ្ជកម្មសំខាន់ កើនឡើង ២៧% ដែល​ធ្វើ​ឲ្យ​ទំហំ​ពាណិជ្ជកម្មរបស់កម្ពុជា ជាមួយនឹងទីផ្សារអន្តរជាតិកើនឡើងជិត១៧%។ ដោយឡែក គិត​ក្នុង​រយៈ​ពេលដូចគ្នាខាងលើ ការធ្វើពាណិជ្ជកម្មរបស់កម្ពុជា ជាមួយបណ្តាដៃគូសំខាន់ មាន​ទំហំ​ទឹក​ប្រាក់​ប្រមាណជាង ៤ពាន់លានដុល្លារ កើនឡើងជិត ១៧% បើធៀបនឹង​រយៈ​ពេល​ដូចគ្នា​កាល​ពី​ឆ្នាំមុន។ សម្រាប់ដៃគូពាណិជ្ជកម្មសំខាន់ៗរបស់កម្ពុជា គឺចិន ដែលសម្រេចបាន​ទំហំ​ពាណិជ្ជកម្ម​ជាង ១,១ពាន់លានដុល្លារ កើនឡើងជាង ១៨% ដោយកម្ពុជានាំចេញទៅចិន ក្នុង​តម្លៃ ១២១លានដុល្លារ កើនឡើងជាង ៥០% ខណៈចិននាំចូលវិញក្នុងតម្លៃជាង ១ពាន់​លាន​ដុល្លារ កើនឡើងជាង ១៥%៕ អត្ថបទ៖ ឈិត បូរ៉ាវី